Rusiya de İroni ıştə hərbiə həmkarəti inkişaf kardovnidə

İron İslamə Respublika Hərbi Dıyoə Donanma komandan kontr admiral Huseyn Xanzadi de ıştə rusiyavojə həmkar admiral Nikolay Yevmanovi dəvəti bə Rusiya 3 ruj muddətinə səfər kardəşe. Ey iyuli 28 –minə ruji de prezident Putini huzuri dəvardə Rusiya Hərbiə dıyo donanma idə ruji munasibəti mərasimədə ıştirakış bıə.

 Bə “Mehr Nevvs”i əsasən “İran.ru” sayti ım xəbə doəşe. Xanzadi bəyon kardəşe ki, çəmə 2 qılə keşvəon arədə hərbiə həmkarəti hevuj karde dair çand qılə saziş dəbastəşone, ımi çəmə mudafiə sahədə munasibəton barzə noğtə hisob karde bəbe.

 “Russia Tuday”ən bə  Huseyn Xanzadi votəyon əsasən məlumat doəşe ki, nezə vaxtonədə  İron de Rusiya Hind okeani və Xəlice-Farsədə dıyo hərbiə ğıvvon bahəm təlimi dəvunie barədə bə ğəror omən. Qımon heste ki, təlimon Hormuz tanqəyən əhatə bəkarde.

Əlavən ğeyd karde lozime ki, Rusiya tankerə hesıbesədə və urani qəncin karde məsələdən İroni tərəfədə votemon kardəşbe. Rusiya Xariciə Koon vəziri muavin Serqey Ryabkovi İroni çe Britaniya tankeri oqəteədə vardə subuton çe londoni İroni kəşti dəstqir kardeədə vardə arqumentisən vey-vey əsasin bıe bəyon kardışe, votışe ki, İron Hormuz tanqəyədə bə ekoloqiya tənəvəc mandedə, çunki çe Britaniya “Stena İmpero” tanker ıştə GPS-lokatori həmuş kardə vəziyyətədə hərəkət kardedəbe ki, ımən bə beynəlxalğə diyo ğanunon zidde,  əmo London de piratəti məşğule.

Çe Rusiya Vyana beynəlxalğə təşkilatonədə daimiə numayəndə Mixail Ulyanovi  bə İroni atomi qəncin karde ğədəğə noe barədə Amerika prezidenti muşavir Boltoni votəyon beəsos hisob kardəşe, və  bə cəmiyyəti nəzə rosniəşe ki, bə nuvə silahi pevolo nıkarde dair beynəlxalğə muğavilə ğol kəşə har qıley devləti, İroniən bənə jıqo qıley keşvəri urani qəncin karde ixtiyarış heste.