ətomiyə sazişədə bank və nat həmkrion İroni əsli iğtisodi həx-huğuğin.

İroni prezident zinə şəv Fransə prezident Emanoel Məkroni telefoniyə rabitədə bə ətomiyə sazişədə İroni iğtisodi həx huğuğ işorəş karde və bə koşınasi iyən ədalətinə hələkə roon dast peydo karde xoto təklifon təğib karde dəvom təkidış ka.

Həsən Ruhani ım telefoniyə rabitədə tojə muzakirəon mısbət və bənav hərəkət hisobış karde və votışe: ətomiyə sazişədə İroni ehdemonon kam beyku hədəf Tehroni mənafe bəji karde iyən muğavilədə bıə co tərəfon ehdemonon əməli bey əv həm de Tehroni nəzər və sazışi çərçivədə be.

İroni prezident əlovəş karde: İron və Avropa miyono həmkarion inkişof karde bəzne bo məntəğə və dınyoro vey xatircəməkə atmosferi icod bıkə və ım sahədə Fransə bənə İroni ğədimi şərik karde bəzne çokə rolış bıbu.

Ruhani Fars dıyoədə Amerkə bıhran icodəkə siyasət hərəkətonış İron və Avropa miyono əloğəonədə bevəcə təsir noe çərçivədə zınəş be.

Ruhani Fars dıyoədə de əmniyyəti bə qəmi rume ozodəti təkid və əlovəş karde: har ruj vey qəmion  Hormoz tanqəku şe-ome kardedən və iron həm bə beynəl xalğ ğanuni əsos bə nəzarət məşğole.

Fransə prezident həm bə İron-Fransə miyono əloğəon, ətomiyə sazişi oqəte zərorət iyən muzakirəon dəvom işorəş karde.