Təxterəvançi: Xarıci ğıvvon iştirok Fars dıyo əmniyyəti məhvəkəy.

İ Bıə Milləton Təşkilatədə İroni nımoyəndə Fars dıyo əmniyyəti oqəte çı saheli kişvəron vəzifə zınəş be.

Bə İrna raporti əsos Məcid Təxterəvançi zinə şəv əmniyyət şura iclosədə təkidış karde ki Fars dıyoədə əmniyyəti təmin karde xoto harcurnə pesoxtə bıə koalisiyaon hukmən məğlob bəbe.

Əv Asiya ğərb məntəğə vey muhimmə məsələ Fələstin məsələ zınəş be və votışe: detosə ım bıhrani həl nıkarde zəmon məntəğə ədə həm stabilə vəziyət icod ə be ni boçi ki sionist rejim Fələstin ərazi işğalış karde və bəpe ım işğal sə bıbu.

Təxterəvançi bə ğərni muğavilə həm işorəş karde və votışe: Amerkə tərəfo ım nohəx və pesoxtə bıə muğavilə məhkum və məğlob bə nine boçi ki bə Fələstinıjon həx huğuğ diğğət bə ni.

Məcid Təxterəvançi bə məntəğə ədə Amerkə mıdoxiləon idomə işorəş karde və votışe: ım mıdoxiləon nımonə İron, Əfğanıston, İrağ, Suriyə və Yəmənədə moşahidə bıdə.

Əv bə Amerkə anti İron cinoyət və siyasəton işorəş karde və Asiya ğərb əsliyə bıhran illəti Amerkə siyasət və mıdoxiləon zınəş be.

İ Bıə Milləton Təşkilatədə İroni nımoyəndə Amerkə anti İron makzimum fişaron məğlob bə nin zınəş be və bə Amerkə rəsmi şəxson tovsiyəş kardeki İroni millət de həzo sor kanti və sabiğə ijən bəştə həyati dəvom bıdon.