İroni xəlice-Fars məntəğədə əmniyyətə koalisiya onoe təklif kardəşe

Sentyabri 14-də Yəməni bepilotə ıştənpəron çe Səudiyyə Ərəbısroni natə obyekton je bə Amerika İbə Ştaton dast İroni ittiham karde ro tojə vonə doşe.

Hərçənd ki, İroni devləti məsul şəxsonədə qıley Mohsen Rezai bəyon kardəşe ki, İroni tərəfi bə Yəməni “Ənsarulla” təşkilati ki, ım həmləon bəştə qiy peqətəşe, hiç qıley silah doəş ni, bə səbəb ki, Yəmən tamam muhasirə vəziyyətədəy. Im, əslədə Yəməni bə Səudon kardə təcavizə hərəkəti doə cəvob bıe.

İİR Xarici Koon vəzir Məhəmməd Cavad Zərifən de “CBS” telekanali musahibədə ım votəyon təsdiğ kardəşe ki, ım çürə modern silahon Yəməni, sabiğ prezident Əli Abdullah Saleh`i vaxtonədə Səudiyyə Ərəbistoniku səşbe.

Rusiya Xarici Kəşfiyyatə Xidməti direktor Serqey Narışkini bə “Tehran Times” votəşe ki, ım həmlədə hiç qıley subut nıvardə, bə co devləti qınokar qəte ro doe nibəbe.

Diə məkəmon ki, bı həmlədə bə İroni iştiraki dair dastdəş hiç qıley subut ni, Amerika Xəlice-Fars məntəğədə de əmniyyəti təmin karde vonə ıştə muttəfiğono ibarət koalisiya onoe cəhdi dəvom kardedə. Tosə ısət Səudon, Avstraliya, Yolə Britaniya, Fransa, Kanada və İbə Ərəbiə Əmiraton bə Vaşinqtoni ım təklifi umjən qıniən. Çey diqər NATO uzvinə muttəfiğon isə ım təşəbbusiku imtina kardəşone. Çimi muğabilədə İroni reqionədə əmniyyəti təmin karde ro de İMT himayə İrağ, Səudiyyə Ərəbıston, Bəhreyn, İbə Ərəbiə Əmiraton, Ğətər, Oman və Kuveyti iştiraki koalisiya onoe təklif kardəşe.

İroni Musəlləhə Ğıvvon Ğərarqoh rəisi muavin Ğədir Nizami bəyon kardəşe ki, ayəndə vaxtonədə de Çin və Rusiya bahəm Hind okean, iyən Omani dıyoədə hərbiə təlimon dəbəvunien. Haliyədə diqər məmləkətonən bə ım tədbiri umjən qınie imkanon muzakirə bedə. De ım məğsədi çand qılə keşvəron hərbiə vəzir və ğərərqohi rəison bə Tehron səfər karde nəzərədə qətə bedə. Ğədir Nizami həmən votəşe ki, İron de diqər devlətonən hərbiə həmkarəti hevuj karde ro əlavə tədbiron bə jimon dəvunidə.