Laricani: İron muğaviməti meydonədə həmmişə Suriyə kənoədəy

İronı islamiyə şura məclisi rəis Suriyə xarici koon vəziri vindımonədə votışe: Tehron muğavimətı meydonədə iyən mıxtəlif siyasiyə baxşonədə həmmişə Suriyə milləti kənoədə bə və omə rujonədə həm bəştə tərəfdarətion dəvom bədoy.

İroni islamiyə şura məclisi rəis Əli Laricani zinə tehronədə Suriyə xarici koon vəzir Vəlid Muəllimı vindımonədə de terarizm mubarizə karde iyən Hələb şəhri ozod kardeyu bə dast vardə səbarzətionış bə ım məmləkəti devlət hərbiyə ğıvvon iyən milləti təbrikış vote və əlavəş karde hal hazırədə əmniyyət iyən oroməti bə Suriyə oqırdıneyu çokə şərayet təşkil bə.

Laricani bə Suriyə sulh muzakiron əhəmmiyyəti işarəş karde və votışe: İron Suriyə və Rusiyə karde bəznen təşkil kardə bərnamon iyən vahidə hərəkətonədə ım roədə muhimmə ğədəmon peqəton.

islamiyə şura məclisi rəis Astanə iclosış muhim zınə və Suriyə məmləkətdə dəvominə sulhi bərpo kardeyu qıləy siyasiyə roş zınə.

Suriyə xarici koon vəzir Vəlid Muəllim həm ım vindımonədə Suriyə məmləkətdə bə muğavimətı cəhbə səbarzətion işarəş karde və votışe: Hələb şəhri səbarzəti muğavimətı əzəmət və zumandəti nışon dodə iyən de terarizm mubarizə kardeədə muğaviməti əhəmmiyyəti oşko kardedə.