İronədə koronavirusi noxəşon çok bey prosses dəvom kardedə.

İroni səhiyyə vəzarətxonə elanış karde ki detosə bə ısət İronədə bə 5 həzo nəfər nezi bə koronavirusi mıbtəlo bıə kəson çok bin.

Bə oxonə raporti əsos İronədə bə 15 həzo nəfər nezi koronavirusi qəteşone ki de təəssufi 853 nəfər çəvonku mardən.

Əmmo İronədə koronavirusi mubarizə barde fəaliyəton de şiddət və zumandəti dəvom kardedə.

İroni sepah təşkilati fərmondə qeneral Husein Səlami zinə İroni səhiyyə kadron zəhməton bə təğdiri bə hisobış varde və votışe: sepah bənə canqiyə şərayet hozzo mande holədə və de koronavirusi mubarizə barde meydonədə İroni milləti kənoədəy.

Xəbə ome bə koronavirusi mıbtəlo bıə kəson çı səlomət cəmiyətiku co karde plani çərçivədə həm detosə bə ısət İronədə 14 milyon nəfəriku soal be və çəvon vəziyət kontrol bıdə.

İroni ərtış həm xəbəş do ki kişvərədə 20 qılə səhro noxəşxonə bəsoxtə ta de koronavirusi mubarizəon de sorəti dəvom peydo bıkə.

İ Bıə Ərəb Əmirətion, Ozbəkistan və Unisef təşkilati homanitarə koməkon həm bə İron varid be; İroni xarıci vəzarətxonə rəsmən de koronavirusi mubarizə barde meydonədə bə İron vığandə koməkon bə təğdiri loyiğ bə hisobış varde.

Diplomatik fəaliyəton dəvomədə həm İroni xarıci vəzir de İnqiltəra xarıci vəzir koronavirusi barədə telefoni muzakirəş karde.

Sərhəddiku həm xəbə ome ki İron və İraği Kırdıston məntəğə miyono ticari fəaliyəton ijən bino be.