İroni Yolə Rəhbər: Amerkə anti İron sanksiyaon cinoyəti nımonəy.

Zinə de Ğıbonə İdi həmzəman, İroni Yolə Rəhbər televezia nıtğədə təkidış karde: Amerkə anti İron sanksiyaon cinoyəti nımonəy.

Həzrət Ayətullah Xamenei dışmenon anti İron sanksiyaon hədəfon bə kırt, miyonə və dıroz mıddət iyən kənoədə bıə hədəfon təğsiməş karde və hamiyəşe: kırtə zəmonədə İroni milləti damondə karde, miyonə hədəfədə İroni milləti elmi inkişofi vəy qəte iyən dıroz mıddət hədəfədə kişvər iyən milləti muflis və İroni iğtisodi vılo karde həmonə sanksiya hədəfonin.

Ə həzrət bə yodış varde: çəvon kənoədə hədəfon de məntəğə muğavimət cərəyanon İroni əloğəon ğət kardeye əmmo de sanksiya vositə zəbisə dışmeni dıl piyə şeyon iyən hədəfon əməli bəni iyən nibəbe ki ıştən həm bəy eterof kardəşone.

İroni Yolə Rəhbər ım nuktə bəyonış karde ki beşək sanksiya mışkilatoni bois bıə və hamiyəşe: kişvərədə problemon qırd bə sanksiya vabəstə ni, i miğdor bə zəifə mudiriyət və i miğdor həm bə Korona vabəstəy.

Həzrət Ayətullah Xamenei bə həğiğəti təhrif karde iyən mıvzoon co cur nəşo doe xoto Amerkə səy-cəhdon işarəş karde və votəşe: təhrifiku iminnə hədəf bə milləti ruhiyə zərbə varid karde və diqər həm təhrim problemi həl kardeyro bə millət ğələtə adres və nışonə doeye.

Ə Həzrət təkidış karde: Amerkə İroniku tələbon, ətom sənaye tam bə kəno noe, mudafiə ğabeliyyəti vey şiddətin kam karde iyən regional iğtidori bə kəno noeye, əmmo ım ziyod tələbion ğəbul karde hukmən Amerkə bə peşo okırniye bois nibıbe, və bə məntığ iyən əğli əsos təcavuzkari vəy qəteyro çəy tələbon ğəbul nibəkan.

Həzrət Ayətullah Xamenei əsli dışmen yəni Amerkə poroblemonış vey dıjd iyən İroni vədə muğaisə nıkardənin zınəş be və Amerkə ısətnə mışkilatonış bənə, əcibə təbəğati fasilə, rasistəti, iğtisodi mışkilaton, hevujə bekoçiyəti, Korona ğəziyə iyən iştimaiyətədə mudiriyət cəhəto behron ki bə ğətl, nohəxi iyən polisi tərəfo işkəncəon bois bıə aşmarde və həmiyəşe: ımruj dınyodədə Amerkə nifrətin bıə iyən bə təcrid şə.

Ə Həzrət təkidışon karde: Amerkədə cari hodisəon, bənə xoki bınədə bıə otəşe ki rost bıə iyən əqə ekıştey həm bıbu ijən rost bəbe və Amerkə ısətnə nizom məhv bəkay boçi ki ım nizomi siyosi- iğtisodi fəlsəfə səhve iyən bə məhv bey məhkume.

Həzrət Ayətullah Xamenei ıştə sohbəton co baxşədə votışe; hecri şəmsi 1397 ədə iyən ətomiyə sazışiku Amerkə xaric bey bəpeşt, de təəsufi kişvər çand manq Avropa vəədəon xoto mətəl mande, Avropa çı Amerkə sanksiyaon vəy qəteyro hiç ko əncom nıdoşe və bənə İNSTEKS nomo maliyə sistem həm qıləy hənək be ki tosə bə ısət əməli bəni.

 İroni Yolə Rəhbər ıştə sohbəton ım baxşədə təkidış karde: embarqon əloc, daxıli zərfiyəton ozod kardeye ki çəy əməli kardeyro bə mucahidəti ehtiyoce.