İron və dınyədə zinə şəvi Şame Ğəribani matəmə mərosimon.

İmom Huseyn(ə)-i Şame Ğəribani mərosim zinə şəv İroni həmmə huseyniyəon və məçitonədə de səhiyyə protokolon rioyəti bərpo be.

zinə şəv məğrib nımoji bəpeştə Çand milyon çı İroni mısılmonə millət İmom Husseyn(ə)-i Əhli Beyti Şame Ğəriban mərasimonədə işterak kardışone ta ə Həzrət iyən çəy bəfodorə əshobi şəhodət, həmçınin Aşura ruji mısibəti nəticədə dər bə dər bıə hırdənon və Əhli Beyt(ə)-i əsirəti matəmədə əzodorəti kon, əvon ım xuninə hadisə ğəmədə ıştəni şərik bəhisob vardışone.

Əzodoron qıləy şərayetdə ki çəvon dastədə ruşinə şam be de Kərbəlo ğiyomi mesaj və peyğomi təbliğəkə Əğileye Bəni Haşim Həzrəte Zeynəb(s) iyən Neynəva səhro və əsiron kərvoni Lider həmdardətoişon karde.

Həğiğətən ki Şam Ğəriban çı İmom Huseyn(ə)-i Əhli Beytiku əsiron, hırdənon və jenon iyən Aşura xuninə vağiə bəpeşt bıə qonə dardi bə yod vardedə, qıləy kərvoni matəm ki ısət Kərbəlo sərzəminədə bepənoh və coyli mandəy.

Zinə şəv de İmom Huseyn(ə)-i Şame Ğəribani həmzəman Həzrəti Əhli Beyti ğurbəti həm bin be.

De səhiyyəvi prinsipon rioyəti İroni Tolışə məntəğəon və Gilani muxtəlifə vırəon bə kəno vey yolə mərasim həm, İron co şəhronədə bərpo be.

İroni Yolə Rəhbəri tono həm zinə şəv İmom Xumeyni(r) nomo bıə huseyniyədə məxsusə mərasim bərpo be.

Əmmo xəbon jeğo hikayət kardedə ki zinə həmzəman de məhərrəmə manqi 10, Aşuraye Huseyni matəmə mərosimon de mısılmonə əzadaron işteraki Yəmən, İrağ, Pakistan, Əfğaniston iyən Tırkiyədə de diğğət bə Koronavirusi protokolon rioyəti bərpo bıə.