Tehronədə bıə şəhid Ğasım Suleymani şəhodəti sorəqardışi mərosim.

Şəhid Ğasım Suleymani və Əbuməhdi Əl-Muhəndıs iyən çəvon həmrəzmon şəhodəti i minnə sorəqardışi mərosim ımruj Tehronədə bərpo be.

Bə İrib raporti əsos, Koronavirusi səhiyyəvi porotokolon rioyət karde xoto ımsornə mərosimonədə milləti işterok ğədəğən bıə əmmo kali daxıli və xarıci rəsmi şəxson və şəhidon ailəon həminə mərosimədə işterok kardedə bin.

İroni Sepahe Ğuds təşkilati fərmondə qeneral İsmail Ğaani həminə mərosimədə şəhid Ğasım Suleymaniş çı muğavimət meydoni merd bə hisobış varde ki muğaviməti ıştəniku binoş karde və votışe: qeneral mayor Suleymani həm İroni milləti ğəhrəmon, həm islamiyə umməti ğəhrəman və həm istikbori ğuddrəti məhvəkə ğəhrəmon be.

İroni Sepahe Ğuds təşkilati fərmondə təkidış karde: Şəhid Suleymani hərbi xusyətonku qıləyni çəy məntiğ be, əv har meydonədə de mənteği varid əbi və əqə muğabilə tərəfon mənteğ zivoni dərəsdə nıbin şəhid Suleymani de co zıvoni de əvon rəftor əki.

İroni Sepahe Ğuds təşkilati nakonə fərmondə Qeneral mayor Ğasim Suleymani ki de İraği dıvləti rəsmi dəvət miladi 2020-ə sori Yanvari 3 bə ım kişvər səfərış kardə be, Bəğdad airporti ətrofədə de Amerkə terroris iyən təcavuzkorə ğıvvon həvo həmlə və de İraği Həşdu-Şəəbi muğavimət təşkilati muavin Əbuməhi-Əl-Muhəndis iyən co 8 nəfər muğavimət rəzməndəon bə ico şəhid be.