İronədə Koronavirusi mardə kəsonku 70 faiz kam be.

1 milyon nəfəriku vey İronıjə Korona qətə kəson holo-əhvol çok be.

İroni səhiyə vəzarətxonə elanış karde ki: 1 milyono 41 həzo nəfəriku vey İronıjə Korona qətə kəson çok bin.

Bə İrib raporti əsos, dəvardə 24 saəti mıddətədə 6283 nəfər bə Koronavirusi mıbtəlo bıə kəs İronədə peydo bin ki çəvonku 603 nəfər hələ noxəşxonəonədən.

ım raportədə ğeyd bıə ki İronədə tosə bə ısət 1261903 nəfər Koronavirusi qətəşone ki de xoşbəxtiyəti noxəşon miqdoriku 1040521 nəfəri hal-əhvol çok be və əvon noxəşxonəonku mırəxəs və ozod bıən.

Əmmo de təəsufi dəvardə 24 saəti mıddətədə 82 nəfər Koronavirusi mıbtəlo bıə noxəşon İronədə ıştə coni dastiku doəşone ki qırd ısət ım pandemiya nəticədə mardə kəson miğdor bə 55830 nəfər rəsə.

Dınyoədə Korona qəte kəson miğdor 87 milyon nəfər iyən mardə kəson ədəd həm 1 milyon 878 həzo nəfəriku vey bıə.

Amerkə həmçenan mardə kəson iyən mıbtəlo bıə kəson cəhəto dınyo statestikaon sədrədəy.