İron iyən məntəğədə bıə Covid-19 vəziyətku oxonə xəbəron.

Dəvardə 24 saəti mıddətədə de təəsufi 82 nəfər Koronavirusi mıbtəlo bıə noxəşon İronədə ıştə coni dastiku doəşone ki qırd ısət ım pandemiya nəticədə mardə kəson miğdor bə 56100 nəfər rəsə.

İroni səhiyyə vəzarətxonə elanış karde: tojədən 5924 nəfər bə Koronavirusi mıbtəlo bıə kəs İronədə peydo bin ki çəvonku 456 nəfər hələ noxəşxonəonədən.

İronədə tosə bə ısət 1280438 nəfər Koronavirusi qətəşone ki de xoşbəxtiyəti noxəşon miqdoriku 1067466 nəfəri hal-əhvol çok be və əvon noxəşxonəonku mırəxəs və ozod bıən.

Əmmo İroniku coqılə xəbə həm ıme ki İroni prezident Həsən Ruhani tojədən bə İron Korona peyvəndi idxal kardey barədə təkidış karde ki İroni millət səpe xarıci şək-şubhəinə vaksinon imtivon karde icozə nibədamon.

Tırkiyəku oxonə xəbə ıme ki Dəvardə 24 saəti mıddətədə bə 10 həzo nəfər nezi Koronavirusi mıbtəlo bıə noxəş ım kişvərədə peydo bin iyən 181 nəfər həm mardən.

Azərbaycan Respublikaku rəsə xəbəron həm Koronavirusi məbtəlo bıə kəson miğdori ziyod beyku xəbə doydə, ım kişvərədə həm oxonə statestika ıme ki 223 həzo nəfəriku vey cəmaət tosə bə ısət Korona qətəşone iyən mardə kəsom miğdor həm bə 2845 nəfər rəse holədəy.

Asiya Cənub Şərğ məntəğəonku həm xəbə omə ki Koronavirusi vəzəyət ım məntəğə kişvəron xususi Yaponiya və Cənubi Kariyaədə vey qıvonin bıə.

Dınyoədə Korona qəte kəson miğdor 89 milyon nəfər iyən mardə kəson ədəd həm 1 milyon 900 həzo nəfəriku vey bıə.

Amerkə de 22 milyon mıbtəlo və 461 həzo nəfər mardə kəs statestikaon cəhəto həmçenan çı Koronavirusi pandemiya behronədə dınyo kişvəron sədrədəy.