İroni Yolə Rəhbər: rəsmi şəxson bəpe Xuzıstani problemon ciddi surəti həl kon.

İroni Yolə Rəhbər bə dıvləti iyən ğəyri dıvləti rəsmi şəxson əmrış karde ki ciddi surəti çı Xuzıstan ostani milləti problemon həl kon.

Həzrət Ayətullah Xamenei ımruk sıb Kov Bərəkət anti Korona peyvəndi 2-ə vaksi jey faxti bə Xuzıstoni ostanədə bıə milləti mışkilaton işarəş karde və votışe: tojədən qıləy vey həğiği dardinə məsələ Xuzıstani ov və çəy milləti vədə bıə problemonin.

Ə Həzrət çı Xuzistoni kanalizasiya, ov iyən ostanədə bıə problemon barədə çimi bənav votə bıə əmr-tovsiyəon bə vırə nırəse və əvoni rioyət nıkardeyku ıştə norohətçiyəti və şikoyəti bəyon kardışe və votışe: əqə həmonə sıxanon əməl bıə be hukmən ımrujnə jığonə vəziyət mışohidə nıəbi ki Xuzıstoni bəfodorə millət de anədə imkonot, təbii sərvət-estedod və veyə zavoton vucudi jəğo norohət iyən norozi bıbun.

Həzrət Ayətullah Xamenei votışe ki Xuzıstoni millət ıştə norohəti bəyon kardəşone, çəvonku hiç şikoyət ni boçi ki ovi problem əv həm Xuzıstoni  jəğonə qamə həvosətədə qədə məsələ ni.

Ə Həzrət bə 8 sornə mığəddəsə mudafiyə cərəyonədə bıə qırd problemon muğaddəmə xəttədə Xuzıstoni bəfodor iyən fidokorə milləti iştiroki işarəş karde və votışe: ın millət bəpe problım və mışkilatonədə nıbu və əqə çəy faxtədə milləti problımon həl bıə be ın şəroyeti mışohidə nıəkimon.

Həzrət Ayətullah Xamenei eyni holədə bə milləti tovsiyəş karde ki dışmoni xəbisə plani barədə mığət bıbun və hamiyəşe: dışmon pidəşe bə İroni kişvər, mənafe iyən nizomi zidd har bəhonəku istifodə ko, çən bəpe aqah bıbəmon və bəy bəhonə mədəmon.

İroni Yolə Rəhbər Korona virusi vədə səhiyyə  kadri zəhməton bə təğdiri loyğ bə hisobış varde iyən daxili anti Korona vaksini soxte sahədə bıə İronıjə elitaonku ğədrdonəti karde kənoədə tosə virusi tam məhv bey faxti milləti bə səhiyəvi protokolon rioyəti tovsiyəş karde.