Ruhani: İron çı sulh iyən dustəti kişvəre.

İroni prezident təkidış kardə: İron İslom Respublika həmmişə tuli tarixədə çı sulh iyən dustiyəti bərğəror karde dumu be.

İroni prezident doktor Həsən Ruhani Yanvari 28 ədə Tehronədə turiston hidayət əkə və turistiyə qrupon rəison beynəl-xalğiyə iclosədə votışe: İronədə vey çokə ozodə jimon ilahi dinon tərəfdaron miyono məçit və kilisəonədə heste və İroni məclisədə həm zərtuşti, xırıstiən və kəlimiyonku nımoyəndəon çı mısılmonə nımoyəndəon kənoədə de ko və fəaliyət məşğulin.

Ruhani əlovəş kardə: İroni haft həzo sornə təməddun və mədəniyəti xıvand bıə milləti qıləy hədəfon ıme ki məntəğə və dınyoədə milləton miyono rabitə və əloğəon bərğəror bıkə.

Ruhani votışe: ısət milləton miyono parçin kəşe faxt ni və əqə milləton miyono parçin həm bıbu bəbe əvoni peqəti.

İroni prezident bə ım nuktə  işorəş karde ki İron dınyo har vırədə de terrorizm mubarizə bardero kamilən hozzoe ijən voteşe: de xoşbəxtiyəti ımruj məntəğədə terrorizm bə məğlubiyət vəziyəti tərəf hərəkət kardedə.

Ruhani bə İroni milləti himoyəon məntəğə və dınyoədə məzlumə millətonku məxsusən terrorizmi vədə işorəş kardə və təsdiğış karde: əqə  bə İrağ və Suriyə aid çı İroni koməkon bıə nəbe, ısət Dəməşğ və bəğdadədə terroristiyə qrupon hakim bin.

Ruhani bə İronədə İslamiyə İnğilabi bə səbarzəti rəse sorqardemoni dəmey işorəş karde və voteşe: İroni milləti qıləy yolə təəccub bardə hadisə binoş kardə ki zınəşe 38 sor çımiku bə nav qıləy İnğilabi bəştə mədəniyyət, din və hədəfon əsos bino bıkə, əv həm be ım ki bə hiç zumandə kişvəri ehtiyocış bıbu.

İroni prezident çı İroni İnğilabi qıləy bərəkətonış milləti izzət hisobış karde votışe: milliyə hakimiyət, bə demokratiya əsos kişvəri mudiriyət karde, və bə milləti sədon diğğət doe çın İnğilabi co muhimmə nəticəonin.