Vyana molağatonədə muğavilə layihə hozo kardəşone.

Ukrayna hadisəon çe dınyo ictimaiyyəti nəzəri cəlb bıkoən, Vyanadə de İroni nuvə proqrami əlağədar molağaton dəvom kardedə, bəştə orəxnə mərhələ rəsedə

Im sıxanon çe Rusiya Xarici Koon vəziri muavin Serqey Ryabkovi votəşe. Məlume ki, Vyanadə İron İslamə Respublika de Rusiya, Çin, Britaniya, Fransa və Almaniya miyonədə antiiron sanksiyon ləğv karde barədə molağaton dəvardedə. İroni molağətə qrupi muşavir Mostafa Xoşeşm`i etiraf kardəşe ki, kali əloməton hestin ki, AİŞ və Ğərbi devləton Vyanada bə saziş ome ro çe İroni şərton ğəbul bəkarden.

İroni Xarici Koon Vəzarəti numayəndə Səid Xətibzadə mətbuatə konfransədə bəyon kardəşe ki, Vyana molağaton yekun sənədi layihə 98 % hozoe, Avropa 3 qılə devlət  və Amerika bə kali məsəlon ıştə munasibət hələ izhar kardəşon ni, nezə rujonədə əvon ıştə munasibəti nişon doəninin. Ey həmən ğeys kardəşe ki, “ İroni bə muğavilə hələ 2015-minə sori ğol kəşəşe, çəmə numayəndə heyət bə Vyana bo tojə muğavilə dəbaste ro oməni. Əmə oməmon ki, AİŞ və həmonə 3 qılə devlət bə 2015-minə sori muğavilə şərton lazımi ğaydədə əməl karde bəştə ehdədari peqəton”.   

İroni Milli Əmniyyəti Ali Şura katib Əli Şamxani bı barədə votəşe ki, qirəm Vyana molağaton nəticə nıdo, bəvədə Amerika təəssuf bəkarde ki, ey ıştə diplomatiyaku boçi istifadə nıkardışe.

“İran.ru” İnformasiya sayti xəbə doşe ki, şanbə ruji bə Atomiə Enerji dair Beynəlxalğə Aqentiyyəti – MAQATE  sər direktor Rafel Qrossi bə İron səfər kardənine. Bı səfərədə çey de İroni hokuməti rəsmiyon və de İroni Atom enerji təşkilati sərdar Məhəmməd Eslami didor karde , tosə ısət Vyana molağatonədə hələ həll nıbə kali məsəlon barədə muzakirəon dəvunie nəzərədə qətə bedə. 

İbrimi Zahirəddin, çe Rusiya Yekaterinburğ şəhəriku, İİR sədo, tolışi radio.