Həvoiyə hərbiyə ğıvvon cəmədə İroni yolə rəhbəri bəyanat.

Fevrali 7 ədə İroni Yolə Rəhbəri Həzrəte Ayətullah Xamenei de İroni həvoiyə mudafiə rəkıtiyə sistımonədə ko əkəyon ijən həvoiyə hərbiyə ğıvvon mıloğat karde cərəyanədə təkidışon kardə: İroni millət bəhmənə manqi 22 minə rujədə bə Amerika təhdidon cəvob bədoy.

Ə Həzrət əlovəşon kardə: Amerikaədə ım tojə prezident bıə odəm deştə sıxanon və hərəkəton çı İroni 38 sori mıddətədə bəyon bıə sıxanon çın kişvəri hakimə dıvləti hevujə fəsodi barde vey şəffaf ijən sərih umumiyə ictimaiyyəti vədə nışoş do və İroni millət bəhmənə manqi 22 minə rujədə çın şəxsi sıxanon və təhdidon cəvobi bədoy.

İroni Yolə Rəhbər bə Amerika tojə prezidenti sıxanon ki votəş be, İronıjon bəpe mıku bıtarsən işorəş kardə və təkidışon kardə: İronıje təhdidonku tarsış ni.

Həzrəte Ayətullah Xamenei bə Amerika tojə prezidenti co sıxanon və lm ki əv votəş be, İron bəpe bə Amerika dəvardə prezident təşəkkur bıkə işorəşon karde və votışone: əmə hiç faxt bə Obama dıvləti təşəkkur nibəkamon boçi ki həmonə dıvlət de İroni milləti iflic karde ğəsd-niyyəti bə İroni əleyh qonə sanksiyaon binoş kardə əmmo bəştə hədəfon nırəsin və hiç faxt co deşmenon həm həminə hədəfi ijən ım yolə milləti iflic karde nibəzne.

Ə Həzrət əlovəşon kardə: əmə boçi bəpe bə Amerika dəvardə dıvləti təşəkkur bıkəmon? bə DAEŞi soxte xoto? bə çəyxoto ki əməni təhrimış kardə? bə Suriyə və İrağədə otəşi rost karde qoronə? və ya xot nifoğ ijən de dimti xoto ki i tərəf xususiyə məktubədə bə həmkari ijən məhəbbəti təkid kardə və co tərəf prezidenti səçıni bəpeştə(1388 şəmsi sori) fitnəkoron peştədə mande?

İroni yolə rəhbər təkidışon kardə: ımon həmonə məxməlinə dastkəşi misdağ və nımonə be ki Amerika dəvardə dıvlət ıştə osonə dasti çəy jentonədə məxfiş kardə be.

Həzrəte Ayətullah Xamenei əlovəşon kardə: Amerika tojə prezident intixabatiyə mubarizəon ijən dəvardə rujonədə deştə sıxanon və rəftoron çı Amerika həğiğiyə sima və obrazi oryan sorətədə dınyo umumiyə ictimaiyəti çəşi vədə nışoş do və subitış karde ki çın kişvəri həğiğət çiç heste?

Ə həzrət Amerikaədə qıləy 5 sorə herdəni dəstqir karde ijən çəy dasti dəbastə hərəkəti çı Amerika insonə həxon misdağ hisobışon kardə və əlovəşon kardə: İmom Xomeyni(r) vey kərə çı Amerika həğiğəti ıştə nıveştəyon ijən sıxanonədə işorəşon kardə bən və isrorəş be ki millət və rəsmion deşməni mahiyyət və şəxsiyətiku oğo bıbon və bə yolə şəyton xatırcəm məbon ki ımruj ə əzizə bə ərş səfər kardə yolə merdi sıxanon həx bey vey ruşin və şəffaf həmə kəson çəşi vədə ğərorış qəte.

İroni yolə rəhbər diplomatiya və koon idarə karde sahədə əğlaniyyət, məntığ və tədbiri lozim zınəşone və təkidışon kardə: bə şəytonon xatırcəm mandə və bəy omidvar bey vey yolə səhvə hərəkəte boçi ki əvon de İroni nizomi vucudi əsl və islam dini hakimiyət muxalifin və bəvon xatırcəm mande bə kişvər hiç xeyri ayid ni.

Im mıloğatdə İroni yolə rəhbər- həbiyə həvoiyə ğıvvon de İroni inğilabi təsis əkə əhd baste hadisəşon inğilabədə qıləy təyin əkə hadisə hisobışon karde və votışone: tağut rejimi zəmonədə həvoiyə hərbiyə ğıvvon siyasi cəhətiku bə Amerika vabəstə bən əmmo tağut rejimi hiç faxt fik karde ne be ki çın sahəku qonə zərbəş bıhardon.

38 sor çımiku bənav və İroni yolə inğilabi bə səbarzəti rəse astanədə İroni Şah rejimi hərbiyə həvoiyə ğıvvon çəy rejimiku co bən və bəhmənə manqi 19 ədə de İmom Xomeyni(r) əhdışon baste.