İroni İnğilobi Yolə Rəhbər: deşmənon mığobilədə muğoviməti nəticə, səbarzətie.

Məhkəmə rəis iyən i dastə İroni məhkəmə təşkilati koəkəyon və rəsmi şəxson vindemonədə, İslamiyə İnğilobi Yolə Rəhbər, deşmənon mığubilədə muğaviməti nəticə, səbarzəti iyən bə inkişof rəsey elanış kardə.

Bə İroni Yolə Rəhbəri mlumatərosnə mərkəzi raporti əsos, həminə vindemonədə Həzrəte Ayətullah Xamenei bə ictimaədə İlahi əvəz nıbıə ğanunon işorəş karde iyən hamiyəşe: Hicri Şəmsi 1360 minnə sori tıl iyən yolə hodisəon mığubilədə İron İslam Respublika dıvlət və İroni milləti təəcubinə səbarzəti iyən muvəffəğiyəti illət, muğavimət, səyocəhd və deşmənonku nıtarse be, və həmmə dıvronədə ım İlahiyə prinsipon tikror bey ğableyətış vındey bıdə, iyən bəpe aqah bıbəmon ki çı 1401 minnə sori Xıdovənd həmon 1360 minnə sorədə bıə Xıdoe.

İroni İnğilobi Yolə Rəhbər, Xıdo dini komək kardey ya Xıdo neməton şık nıkarde nəticə barədə, bə Ğıronədə bıə çand nımunə İlahi prinsipon və ğanunon işorəş karde iyən hamiyəşe: Kərimə Ğıron çı İlahi ğanunon iyən prinsipon şomile ki çəy nəticə ıme ki əqə milləton deşmənon mığubilədə, muğavimət iyən de bə Xıdo təvəkkoli vositə bəştə məsuliyəti əməl kon, çəy nəticə səbarzəti və bə inkişof rəseye, əmmo əqə milləton ixtilof, zəifəti iyən xoşi dumoədə bıbun, çəy nəticə məğlubiyət bəbe.

Həzrəte Ayətullah Xamenei bə  deşmənon şoəti İroni daxıli kali baxşon nırəsə vəziyəton ki bə zəifəti xoto icod bəbe, işorəş karde iyən əlovəş do: dəvardə 40 sori mıddətədə və həm 1360 minnə sorədə və həm çımiku bəpeşt dışmenon de veyə xoşhali bə jığonə vəziyəton diyə kardedə bin ki quya çəmə nizomi oxo rəsedə, əmmo çəvon umid qırd nomid bıə boçi ki əvon ın nomidi və ıştə bezu bey sirri zıneydə nin.

Deşmon dərəsedəni ki aləmədə sıvoy siyosi hisob kitobon, co hisob kitobon həm heste ki bəy İlahi sınnəti voteydən.