Rəisi: İroni Kırdıstoni millət ğəyrətin, erjinə mədəniyət iyən sivilizasiya soybin.

İron İslam Respublika prezident, İroni Kırdıstoni əholi qıləy ğəyrətin, erjinə mədəniyət iyən sivilizasiya soyb bıə millət bə hisobış varde.

Imruj sıb, İron İslam Respublika prezident ıştə 27 minnə ostaniyə səfərədə, deştə vəziron iyən dıvləti kabineti bə ico, bə İroni ğərbədə bıə Kırdıstoni ostan varid bıə.

Bə İron İslam Respublika prezidenti məlumatərosnə mərkəzi raporti əsos, İron İslam Respublika prezident, Sed İbrahim Rəisi həminə səfəri barədə votışe: İron İslam Respublika torixədə, Kırdıston bənə muğavimə ostan zıney bıdə, ki 5 həzo şəhid və 9 həzo nəfəriku vey conbozi bə inğilob təğdimış kardə və həğiğətən inğilob və islamiyə inğilobi hədəfon bə vırə rəseyro ıştəniku muğavimət nışoş do.

Rəisi əlovəş do: İronədə Kırdıstoni ostan bənə de mədəniyət və sivilizasiya ostani zıney bəbe və ım ostani həmmə məntəğəonədə mədəniyət və torixi kanətiku fəxrinə nışonə mıvcude.

İron İslam Respublika prezident, məhorətin, cıvon iyən təhsiləkə insoni koəkə, çə Kırdıston ostani vey muhimmə zərfiyətonku bə hisobış varde iyən əlovəş do: ım ostan kaştemon, moləvonəti, turizm və məədən baxşədə vey zərfiyəton soybe.