Ruhani: İron pidəşe de məntəğə həmmə kişvəron əloğə və rabitəş bıbu.

İroni prezident voteş: İron məntəğədə rabitəon ijən həmkarion ziyod karde pidəşe və Tehroni oxonə hədəf məntəğə həmmə kişvəronədə stabiləti, əmniyyət və inkişofi rost kardeye.

İroni prezident Doktor Həsən Ruhani ımrujnə sıbi faxtiku bə Omman və Kuveyt səfər karde bənav jurnaliston cəmədə bə Fars Dıyo həmkari şuraədə uzv bıə kişvəron veyə əloğəon de İron həmkarion ziyod karde işorəş karde və voteşe: Kuveyti dıvlət çı ərəbiyə kişvəron tərəfiku qıləy peyğomi bə İron vığandəş be ki çəy dılədə bə ərəbiy kişvəron piyə iradəon ijən tojə hərəkəton de İron çokə rabitəon bərğərar karde, dəvardə problemon həl karde ijən de votımoni vasitə həmkari miğdori ziyod karde təkid be.

Ruhani çı İroni xarıci siyasəti əsosış de hamsuyə kişvəron ijən de islamiyə kişvəron həmkari karde hisobış karde və voteş: İron hiç faxt bə co kişvəri təcavoz karde və ya xot bə co kişvəron və milləton ıştə dini, məzhəbi və siyasiyə əğidəon icbor karde fikədə nıbe və pidəş ni qıləy məmləkəti daxıliyə mıvzoonədə mıdoxilə bıkə.

Əv təkidış kardə: bo İron İslam respublika çı Fars Dıyoədə əmniyyət vey məxsusə əhəmmiyətış heste və ım məntəğə əmniyyət bəpe çı məntəğə kişvəron tərəfiku təmin bıbu ijən Fars Diyodə xarıciyə kişvəron huzur həmişə bə çəvon zərər və ziyon bıə.

Ağaye Ruhani təkidış kardə: çı məntəğə kişvəron fik-fəm anə ziyod heste ki ıştə çı Fars Dıyo əmniyyəti təmin bıkən.

İroni prezident həçınin voteş: Fars Diyo hamsuyə kişvəron və İroni miyono bo həmkarion hevuj karde xoto vey çokə zərfiyəton hestin ijən 2 tərəfiyə rabitəon çın səfəri qıləy hədəfon heste.

Ruhani bə nezə şərğ məntəğə ısətnə vəziyət işorəş kardə və voteşe ım səfərədə de Omman və Kuveyti rəsmiyon Yəmən, İrağ, Suriyə və məntəğə barədə votemon bəbe boçi ki ım kişvəron karde bəznen Yəmənədə canq və xonon ro karde vəy qəte barədə mısbətə rolışon bıbu.

İroni prezident imruj, de Ommani kral və Kuveyti əmiri rəsmi dəvəti bərobər bə ım 2 qılə kişvər səfərış kardə.