Dəvardə 5 manqi mıddətədə İroniku tranzit 25 faiz əlovə bey.

İroni şəhr soxtey iyən roy vəzarətxonə nəğliyati muain votışe: dəvardə 5 manqi mıddətədə İroniku tranzit 25 faiz əlovə bıə.

Miladi 2021 minnə sori Avqustə manqi 3 minnə rujədə, İroni 13minnə dıvləti ko bino bey tosə bə ısət, elanış kardə be ki xarıci siyasətədə balans icod kardey çərçivədə, de hamsuyəon və islami kişvəron həmkoəti hevujəti ıştən xarıci bərnoməon iminnə hədəfon ğərorış do.

Reqiyonalizmi siyasət, bə şərğ diyə kadey, məntəğə və beynəlxalğə təşkilaton və onemonon bənə Şanxhay və EKO iğtisodi həmkari təşkilatiədə iştirok kardey, əcumlə İroni xarıci siyasəti balans icod kardey nımunəonin ki 13 minnə dıvləti səmtiku əncom bəbe.

Bə Tele-Rədio aqentiyəti raporti əsos, İroni şəhr soxtey iyən roy vəzarətxonə nəğliyati muain Şəhriyar Əfəndizodə votışe: dəvardə sorədə( Şəmsi 1400) tranzit, bə 10 milyono nim rəsəş be ki dəvardə çımiku sori muğaisədə 2 bərobər əlovə bey nışoş do.

İroni şəhr soxtey iyən roy vəzarətxonə nəğliyati muain əlovəş karde: təyin bıə ki Şəmsi 1401 minnə sorədə İroni tranzit bə 20 milyon ton bərəse və ım hədəf bə vırə rəseyro, muxtəlifə bərnoməon əcumlə de dustə kişvəron veyə təvafuğnoməon icra bey holədəy.

Əfəndizodə ijən bəyonış karde ki har sor təğribən Çin kişvəri səmtiku bə Avropa kişvrəon 60 milyon ton əmtəə varid bəbe. Əv ijən votışe: de diğğət bə İroni mıvğiyət ki həm şimol bə cənub royədə və həm şərğ bə ğərb royədə ğərorış qətə, İron karde bəzne əmtəə vırə bə vırə kardeyro mınosibə roy bıbu.

İroni şəhr soxtey iyən roy vəzarətxonə nəğliyati muain həmçınin bə Rusiyə və Ukrayna daveon işorə iyən əlovəş karde: şəhr soxtey iyən roy vəzarətxonə jıqo plan kəşəşe ki cari sorədə və şimol-cənub royku 30 milyon ton tranzit əncom bıbu.