22 həzoku vey Pakistonıjə zayiron bə İron varid bey.

İroni Sistan və Bəluçıston ostani Ərbəine Huseyn(ə)-i sıxənəvot xəbəş do ki 22 həzoku vey Pakistonıjə zayiron bə ım ostani cənub şərğ varid bıən.

İroni Sistan və Bəluçıstan ostan, vey yeqanə roy bə hisob omeydə ki Pakiston kişvəri bə Mərkəzi Asiya, Avropa iyən İrağ rosneydə.

İslamiyə inğilobi səbarzəti bəpeşt, İroni ım cənub şərğiyə ostani marz, bə İraği Kərbəlo muğəddəsə şəhri rəseyro, bə Pakistoni zairon səmt oj bıə.

Bə İrna raporti əsos, İroni Sistan və Bəluçıston ostani Ərbəine Huseyn(ə)-i sıxənəvot Cəvad Ğənbəri votışe: tosə bə ısət, Mircave iyəb Rimdan marzonku, 22 həzo 355 pakistonıjə zayir bə ım ostan varid bıən iyən peşo bə Kərbəlo muğəddəsə şəhr şedən.

İroni Sistan və Bəluçıston ostani Ərbəine Huseyn(ə)-i sıxənəvot ijən təkidış karde: ım ostanədə Pakistonıjə zayiron rifohro lozimə imkanaton iyən şəroyeton hozzo bıə. əv ijən əlovəş karde: dəvardə manqonədə, Mircave iyən Rimdan marzonku Ərbəine Huseyni(ə) zayiron varid beyro bərnomə iyən planon əncom bıə be və lozimə zəminəon xususi Rimdan marzədə hozzo bıə be.

Hicri Ğəməri 1444 minnə sori səfə manqi 20, miladi 2022 minnə sori sentiyabri 17, Kərbəloədə şiəyon 3 minnə İmom Həzrət İmom Huseyn(ə) və çəy bəfodorə əshobi şəhodəti 40 minnə ruje, həminə rujədə çand milyon zair İmom Huseyn(ə)-i pokə hərəmi ziyorət kardeyro bə İraği cənubədə bıə Kərbəlo şəhri səfər bəkan.

Dəvardə soronədə, mısılmonon və vo İlahi dinon tərəfdoronku kali, bə İmom Huseyn(ə)-i şəhodətə Ərbəini çand ruj mandə, de şemoni royku Nəcəf iyən İraği co şəhronku ıştəni bə Kərbəlo və İmom Huseyn(ə)-i pokə hərəm rosniyedən.