Ruhani:sionist rejim ğeyri ğanuni və ğərbi tərəfiku təşkil bə.

İron İslam Respublika prezidenti votışe:fələstinı mevzo islam dınyoədə həmməysə muhimmə məsələy və votışe:sionist rejim qıləy pesoxtə bə rejime və ğərbi dastədə təşkil bə və insonə həxon ləğv kardə.

İron İslam Respublika prezident Həsən Ruhani zinə fələstinı intifazəku mıdofiyə 6 nə beynəlxalğə konfransi bə oxo rəse mərasimədə bə fələstinı işğal be tarixiyə təcrubə işarəş karde və ıştə sıxanon dəvomədə əlavəş karde Fələstin qıləy toyfə iyən milləti problem ni bəlkə I tərəfədə zılm və sitəm və beynəlxalğə həxon əhəmmiyyət nıdoe və beynəlxalğə təşkilaton bə kar nomeye və cotərəfədə qıləıy milləti mutəmadiyə mucahidə fəaliyyəton nışonə ıştə həxi bərpo kardeyu beynəlxalğə  səthədə bə ictimaiyyəti təziğon iyən bəzi islamiyə məmləkəton şərmin be konədəy.

prezident Ruhani işarəş karde ki fələstinı milləti sərzəminon ğəsb karde dəvomiyo təziğinə hərəkəton iyən de nakonə hədəfon ım sərzəmini tarixi və mədəniyə şəxsiyyəti əvəz kardeyu qədə-qədə dınyo sulh və əmniyyətiyu bə vironəkə nəticon bois bə.

president Ruhani ıştə sıxanon dəvomədə votışe:sioniston çimi domoədən ki dınyo odəmon bovə bıkən ki fələstinıjon avərəoni hestin ki bəpe be sərzəmin jimon dəvomon və muğaviməti onvani de terarizm əvəz karde və dırozə fəaliyyəton həm  təslim və dustiyəti məsələ addi kardeyu həminə məsələ xotoy.

İron İslam Respublika prezident həmçinin nezəşərğədə bə nooromətion iyənproblemon işarəş karde və votışe:Yəmən İrağ Suriyə və Əfğanistanədə canq dave və terror ha ruj  çandəsa insoni coni qətedə və islamiyə devləton harqıləy hədəfiku kəno jıqo təşkil bə daveon vəy qəte bə iyandı zid bıhton jeədə və jıqo təəssufinə şərayeti foydə bə işğalqərə sioniston ğısmət bedə.

prezident Ruhani əlavəş karde İron İslam Respublika bovəş heste ki nezə şərğədə ədolətin iyən umumiyə sulhi bərğəror karde fəğət bə fələstinı sərzəmini işğalqərətion oxo doe iyən ım milləti kamilə həxon bərpo karde və çəvon tale bə çəvon ıştən dast doeədə həmçinin avərəon bəştə sərzəmin oqırdıne və qıləy vahidə fələstin devləti de Şərifə Ğodsı paytəxtəti və çı sərzəmini həmmə toyfan və əsosə sakinon sədo doeədə çı mıslmon xıristiyən və yəhudi iştirak kardeədə bə nəticə  bərəse.

İron İslam Respublika president işarəş karde hər çənd fələstinıjon həxi bərpo kardeyu həmmə mıslmonon vədə qıləy saxtə ro heste əmmo ə millət ki ıştə həxiku mıdofiyə kardeyu cihadı roş vıjniyə muvəfəğ bəbe.

Fələstinı milləti intifazəku mıdofiyə karde 6 nə beynəlxalğə konfrans 3 şanbə ruji islamiyə inğilabi yolə rəhbər həzrət ayətullah Xamenei  iyən ironi president məclis iyən məhkəmə rəison və islam dınyo yolə şəxsiyyəton ıştirak kardeədə həmmə bə ico fələstiniku tərəfdarəti nomo bıə şoari tehroni islamiyə məmləkəton yolon iclosi salonədə obı.

80 qılə heyət və 700 qılə xariciyə mehmon fələstinı milləti intifazəku tərəfdarəti karde 6 nə beynəlxalğə konfransədə iştirakışon kardə be.