Həzrəte Fatimə (s) Şəhodəti sorə qardışi təsliyət
Imruj 5 şanbə hicri ğəməri 1444 nə sori cəmadiuləvvəli 13(2022 dekabri 8) bə qıləy rəvoyəti əsosi islami qiramiyə peyğəmbər həzrət Muhəmməd (s) qiramiyə kinə və dınyo şiəyon 1 minnə imom Əli ibne Əbitaleb(ə) həyat həmro Həzrət Fatimə Zəhra(s) şəhodəti sorəqardışe.
Əhle beyte esmət və təharət(ə) aşığon məçiton huseyniyəon məzhəbiyə vıron iyən İroni şimol şərğ Məşhəd şəhrədə Həzrət imom Rıza(ə) novraniyə hərəm və tehroni cənub Ğom şəhrədə Həzrət Məsomə(s) Xıdo rəsul(s) qiramiyə kinə məzlumanə şəhodəti matəmə mərosimədə iştirakışon kardə.
Həzrət Fatimə Zəhra(s) besəti 5 nə sori cəmadiussani 20 nə ruji Məkkədə bə dınyo omə.
Həzrət Fatimə Zəhra(s) hırdənətico ıştə qiramiyə dədə Xıdo rəsul(s) hidayətonədə de ilahi əlaə muarif oşno be həzrət Xıdavəndə xalıği dərqah vıjniyə bıə şəxsiyyətonku be ki ilahiyə elmon sərçəşməku veyə bəhrəş bardə be.
Həzrət Fatimə Zəhra(s) ıştə jimoni sərosərədə səxavət isar(ıştə həxiku dəvarde) səbr ğənaət iyən pərvərdiqari ibadət və bə jindaston komək kardeədə həmməysə çokə şərayetəndə nışon doeədə yol iyən tarix əsoxtə insonon bənə İmom Həsən(ə) və İmom Huseyn(ə) ıştə domənədə perosnişe.
Həzrət Fatimə Zəhra(s) 18 sor jimon karde bəpeştə zəmonə hakimon veyə zılm iyən ıştə əzizə dədə Həzrət Muhəmməd(s) bə rəhmət şeku əzob və norohətion nəticədə bə qıləy rəvoyəti əsosi cəmadiussani 11 minnə ruji bə şəhodət rəsə.
İron İslam Respublika telerədyo de Həzrət Fatimə Zəhra(s) şəhodəti sorəqardışi mınosibəti bə həmmə mıslmonon və dınyoədə ozodəti tələb kardəkəson təsliyət votedə.
