Sepah Təşkilot çı İroni zumandəti noğtəy.
Tehroni mıvəğğətə cımə İmom Sepah Təşkiloti barədə Avropa parlamenti ğeyri ğanuni hərəkəti məhkum kardışe və votışe: Sepah çı İroni zumandəti noğtəy.
Huccətul İslom vəlmuslemin Muhəmməd Cəvad Əli Əkbəri çı Tehroni zinə ruji cımə nımoji xotbəonədə votışe: İroni millət və nizom Sepah Təşkiloti vey pidəşone və İroni dıvlət iyən məcles hukmən çı Avropa jıqonə hərəkəton vədə mınosib iyən zumandə reaksiya nışo bıdan.
Əli Əkbəri əlovəş karde: Avropa parlamenti ın koy hiç əhəmiyyət və erjış ni boçi ki əvon İroni ğəhrəmon, barz və dəvəşə Sepah Təşkiloti vırə zəif karde əzı nin.
Huccətul İslom vəlmuslemin Muhəmməd Cəvad Əli Əkbəri təkidış karde: Asiya ğərb məntəğədə bıə muğavimət cəhbədə Sepah və bəsic təşkiloti rol iyən vırə muşahidə bıdə ki çəyədə çand həzo alim, zumand iyən bə ko ome uzvon hestin ki İslomi İnğilobi hədəfon bənav bardedən.
Əv Avropa tərəfo jıqonə rəftoron çı deşmənon be zu bey nımunə bə hisobış varde və votışe: Avropa ijən ıştənış bənə Amerkə və sionist rejimi dastədə bıə hənəkçə və boziçə nışoş do və hol ın ki əvon ıştən canq, enerji və iğtisodi bıhranədə qiriftorin, İronədə iğtişoşon bə vırə rosniyero cəhd kardışone.
Nımoj votəyon həm de şuaron vanq karde, Avropa parlamenti ın xəbisə koy məhkum kardışone.
