Bağırikəni: de məntəğə kişvəron rabitəon zumandəti İroni xarıci siyosəti iminnə koonkue

İroni xarıci vəziri siyosi muavin, de İraği Əlfəth nomo koalisiya siyosi cərəyoni yoli vindemonədə təkidış kardə: İroni xarıci siyosəti iminnə koonku qıləyni de məntəğə kişvəron rabitəon zumand kardeye.

İron İslom Respublika xarıci vəziri siyosi muavin, Əli Bağıri Kəni bə İron və İraği mıştərəkə kumitə iclosi bərpo bey iyən de ım kişvəri ali rəsmi şəxson məşvərət kardey xoto, deştə ali heyəti bə ico bə bəğdad varid bıə.

Bağırikəni çəmiku bənav de İraği prezdent, Əbdullətif Cəmal Rəşid, İraği milli əmniyyəti mışovir Ğasım Əleraci və İraği islomi aliyə parlamenti yol Həmam Həmodi vindemon iyən votımonış kardə.

Bə İrna raporti əsos, zinə çoşəmbə İroni xarıci vəziri siyosi muavin, de İraği Əlfəth nomo koalisiya siyosi cərəyoni yol, Hadi Əlameri vindemonış kardə və ım vindemonədə votışe: İron İslom Respublika İraği himoyə kardedə və həmmə mıtəfiğon iyən çəy duston kənoədə bəmande.

Bağırikəni ijən bə İroni atomiyə brnomə işorəş kardə iyən votışe: məntəğə kişvəron İroni atomiyə bərnomə sulomiz beyku etımoşon bıbu.

İraği Əlfəth nomo koalisiya siyosi cərəyoni yol həm ım vindemonədə xarıci həmmə xəbisə planon vədə İroni millti muğavimət, İron İslom Respublika muvəffəğiyətvey muhimmə amilonku qıləyni zınəşe və məntəğə və İrağədə de terrorizm mubarizə bardeyədə xususi Şəhid Ğasım Suleymani rol iyən İroni himoyəon işorəş kardə.

Əlameri ijən İron və İRaği miyono 2tərəfiyə rabitəon vey zumand zınəşe və əlovəş kardə: diplomatiya royku ım rabitəon nığılətiro cəhd bəkamon.