Nablusədə muğavimət de sionist rejimi vədə dim bə dim bıə

Zinə şəv çoşəmbə Fələstini Nablusi batalyoni Ğudsi qrupon elanış kardə ki bə Nablus şəhri hərbiçion həmlə dumoədə muğaviməti mubarizəkəyon de sionist rejim dave kardışone.

Bə İrna raporti əsos ki Fələstinıjon mediyaonku xəbəşon do, Nablusi batalyon təkidış kardə ki muğaviməti mubarizon de sionist rejimi hərbiçion silohinə deve əncom doşone iyən çəvon royədə həm çand qılə dast soxtə bomba tepemon kardey cərəyonədə bə deşmon zərəl ziyon varid kardışone.

Co tərəfiku sionist rejimi 14 nomo kanal həm xəbəş do ki Nablusədə çand sa qədə şəhr sakin bıə yəhodion sionist rejimi himoyə jintonədə bə Həzrəte Yusuf dəkandə bıə vırə həmləşon kardə.

Sionist rejimi qədə şəhron sakin bıə kəson har çand vaxt i kərə və bə Telavivi rəsmi şəxson təhrikon əsos bə Məçituləğsa həmlə kardedən və cəhdışon heste ki ım muğəddəsə vırə vəziyəti əvəzko.