Ruhani:Kaspi deyo İron və hamsoyan əlağon inkişafədə muhimmə rolış heste.

İron İslam Respublika president votışe:Turkmənistan Ğazağıstan Rusiyə və Azərbaycan Respublika ironi çokə hamsoyanku hestin ki bəbe Kaspi deyo royku dəvon əlağə inkişaf doe.

İron İslam Respublika president Həsən Ruhani ironi şimal Qilan ostanədə həmzəman çanqılə plani okarde mərasimədə hindostaniku bə Rusiyə 20 milyon toniyə boon ovıştıne əhəmmiyyətiku işarəş karde və votışe:ım miğdar vəsilə ovıştıneku bəpe tikəy ironiku əncum bıbo və ironi cənub Bəndərəbbas porti bə Maskva vəsl kardeədə Hindostan İron Rusiyə və coqlə məmləkəton veyə foydə bə dast bəvarden.

president Ruhani votışe:tıranzit və roon bə iyandı vəsl karde ko iyən fəaliyyət və ixtisadiyə inkişafədə veyə əhəmmiyyətış heste və əlavəş karde Rəşt-Ostoro osınə ro soxte bı nezonədə  Azərbaycan Respublika koməkədə təşkil bəbe.

president Ruhani İron və Rusiyə miyonədə ğətari 6 həzo qılə boə vaqoni hıriye ğərardadi imza kardeku xəbəş do və votışe: 1 həzo soxtə bə vaqon bə iron təhvil doə bəbe və 5 həzo qılə vaqon həm ironədə soxtə bəbe ki ım ko bə istihsali inkişaf bois bəbe və məmləkəti cıvonon həm bə ko və fəaliyyət məşğul bəben.

president Ruhani votışe: ironi tranzitiyə royku istifadə karde Tehron Maskva Dehlino və coqlə məmləkətonru veyə foydəş heste və ixtisadiyə emtiyazış heste və əlavəş karde Qilan ironi mıxtəlif məntəğon iyən Kaspi deyo şimaliyə məmləkəton bə iyandı vəsl kardedə və ko iyən fəaliyyəton icod kardeyu çokə şərayetış heste.

İron İslam Respublika president bə Qilan ostani zinə təşkil doə səfərədə sənaye porti fəaliyyəton ditəsərrufati fəaliyyəton rabitə və texnoloqiya  noxəşxonə iyən ovonəbıkə koonədə 17 qılə planış okarde.