İmom Kazımi(ə) şəhodət

İmom Kazımi(ə) şəhodət

Imrujnə insonon vəsfonku qıləyni bə dınyo cəh-cəlol iyən dəb-dəbə nisbətədə bıə dıl dəvastey iyən aşığ bıeye.

İmom Kazımi(ə) nəzəku ehyanə insonon ın həyğəti dərk bıkon ki,ın foniyə dınyo bo əbədiyə məkoniro qıləy mənzilqo və məkone,dınyo jimonədə çe şoyvonəti iyən roziyəti həyğəti dərk bəkardeyn.İmom Kazımi(ə) nəzəku dınyoədə bo hərisəti iyən təməhkoəti rəğ-rişə bırniyero,de mıxtəlifə təbiron çı dınyo neməton ğədr iyən ğıyməti,nəzəonədə arışteydə ta çe dınyo aşığon bəştə boon iyən hərisonə şikilədə çəy dumo nıbon və həmmə erjon bəy rəsey royədə ıştə po jiyədə nınon.

İmom Kazımi(ə) nəzəku dınyopərəstəti çe har qıləy xəto sıftəy.ın qıləy eyni iyən obyektiv və realə fakte.çoko ki,qıləy zəmon ki, əmə bə canqon,bə xun rukardey iyən bə kutləvi ğətlon və hətto bə bıvon iyən duston miyono canqon və bə kriminal iyən cinoyi pərvəndə və dosyeon nəzə kardedəmon,əyo dınyopərəstəti po rizon oşko iyən məlum beydə.dınyotələbon rufi iyən psixoloji cəhəto həm qıləy oromətişon ni.hətto çəvon tan iyən cismi həm qıləy osoyişış ni və əvon bəştə dırozə oruzuon rəsyero dayima səy kardedən iyən fəoliyyət nışon doydən və bə ziyodə giriftorətiyon dıço beydən.

İmom Kazım(ə) ıştə sıxanonədə bə dınyo həyğətiku bıə qıləy hevujə cəhəton işorə kardedə və bə Hişam ibn Həkəmi bıə tevsiyədə jıqo hamyedə:”ha Hişam ha! Təbarək iyən Təala Xıdovənd bə alimon pand iyən nəsyətış doə və bəvon bə axırəti səmt meylış do və hamyedə:”və dınyo jimon ğərəz hənək iyən həvəsbozətisə co çi ni və həyğətən bo təğvo əhli coqlə məkon veyçoke.aya ıştə ağliku oko doydəniyon?və həmçinin  hamyəşe:”bəşmə doə bıə çiyon dınyo jimoni məto(mol və əmtəə) iyən çəy ziynəte və Xıdovəndi nəzdədə bıə çiyon veyçok və əbədiye.aya əndişə(fik-fam)kardedəniyon?.

İmom Mosə ibn Cəfər(ə) çandə kərə ıştə duston iyən şiyəonışon bə dınyəvi jimonədə təğvo ğıvvə zumand kardey səmt dəvət kardedə və çe dınyoku dırıstə şikilədə oko doey iyən çe dınyəvi zohironku de səlomətəti dəvardey roon nışon doydə və hamyedə:”innə Luğmanə ğalə libnihi....loğmani bəştə zoə voteşe:ha çımı zoə ha! dınyo qıləy nığılə dıyoe ki,veyə odəmon əyo ğərğ bıən.çən,bəpe bəvədə ıştı(nicoti)kəşti Mutəolə Xıdoku tars iyən təğvo bıbu”.

Həyğətədə İmom Kazımi(ə) nəzəku bə təğvo iyən imoni malik bey,bə Xıdo təvəkkul kardey iyən de səbri bə ico çe ağl iyən elmiku oko doey,çe dınyoku de səlomətəti dəvardey kilide.

İmom Kazım(ə) bo çəvon çəşon fəğət çın dınyo dəb-dəbə vində dınyopərəstə fərdon mıolicəro həmməysə çokə ro ,dınyo iyən axırəti mığoyisə kardey zıneydə.əvon bəpe ın dınyo de axırəti dınyo har cəhətiku mığoyisəkon və peşo intixobkon və bıvıjnon ki,çəvon hərəbaxtəti kom dınyoədəy.   

İmom Kazım(ə) ıştə umri ziyodə zəmonış çe haruni zindonədə dəvordınışe.rujon dəvardedəbin iyən aləmi həşi məşrığiku pemedəbe və məğribi səmtədə eşeydəbe.əmmo çandə soron be ki,İmom Kazımi(ə) bın hevujə aləmi ruşnəku qıləy səhmış nıbe və ə həzrət çe zindoni qıləy hırd iyən toykiyə otağədə qıləy kamə nur və ruşnəku bəhrə bardedəbe.bə haruni saray əks ki, çe məst və sərxoş bıə dınyopərəston jıə nə`rə bə osmoni səmt rost beydəbe.