İroni reaksiya bə Britaniya i minə vəziri yavə sıxənon.

İroni xarıci vəzarətxanə sıxənəvot təkidış kardə: məntəğədə beqınohə milləton ğətliam karde xoto bə təcavozkaron siloh həvate məxsusən bə Yəməni əleyh Ərəbıstoni nobərobər iyən ğeyri insoniyə hucumədə de Britaniya i minə vəziri iddiyaon həmohənq ni.

Bə İrib raporti əsos Bəhram Ğasımi Ərəbıstonədə bıə Tereza Mey tojə səfəri cərəyonədə bəyon bıə iddiyaon cəvobədə votışe: de təəsufi ım i minə kərə ni ki Britaniya i minə vəzir rostəti əvəzi doə vujətiş pidə.

Ğasımi təkidış kardə: Britaniya i minə vəzir vey rohət məntəğədə dəvardə soronədə bıə hadisəon ijən tarixədə bıə həğiğəton barədə ıştə çəşış bastə və de ğəsd-niyyəti ya xot səhvən çı yodo bekardə ki nızə şərğədə ısətnə no əmnion, be stabilə vəziyət iyən bə domo mandə bevəcə şərayeton, məntəğədə canq soxte, təcavoz və mıdoxilə sahədə Britaniya iyən çəy həmpeymonə dustə kişvəron stemari, be ədolət ijən ziyod tələbion nəticəku bə vıcud omə.

Ğasımi votışe: yəğin nızə şərğ həssasə stratejikə məntəğədə əmniyyət, oromətəti və stabiləti təmin kardero İroni ciddiyə iradəon və cəhd qıləy dəğiğ, şəffof və bə tədbiri əsose ijən çəy hədəf de terrorizm və repressivə hərəkəton mubarizə barde cəhətdəy.

İroni xarıci vəzarətxanə sıxənəvot votışe: Tereza Mey tərəfiku jıqonə yavə sıxənon və ittehamon qıləy vəziyətdə bəyon bıdə ki İron i tərəf təcavoz bıə kişvəronədə sulh, əmniyyət və stabilətış pidə və co tərəf har komək tələb bıkə kişvəriku həm tərəfdarəti kardedə.

Ğasımi əlovəş kardə: məvuji Beritaniya i minə vəzir və çəy nızə dustə kişvəron məntəğədə ıştə hisob kitobon əməli ne bəy ijən İrağ və Suriyədə terroristiyə qrupon məğlubiyətiku vey xoşhal bənin və həmçınan pidəşone məntəğədə no əmniyyətion və be stabilə vəziyət dəvom peydo bıkə.

Əv ijən təkidış kardə: İron jıqonə sıxənon və iddiyaon ki cəhətdore və çəy hədəf fəğət məntəğə pul və bəzi kişvəron rozi mande cəlb karde heste məhkum kardedə və jıqo intizorış heste ki londoni rəsmion de həğiğəton dərk karde və ıştə kanə təcrubəonku istifodə karde xoto fars dıyoədə ıştə dəvardə nadırıstə siyasəton isloh bıkən.

Britaniya i minə vəzir Tereza mey ujnən bə məntəğə Ərəbiyə kişvəron səfər karde cərəyonədə İronış bə məntəğə noəmn karde mıttəhəmış kardə.