Amerkə xiyol kardedə ki çı dınyo ğazi və polis əve.

İroni prezident Amerkə bə Suriyə hərbiyə hucumi məhkumış kardə və votışe: Amerkə xiyol kardə ki çı dınyo ğazi və polis əve.

Həsən Ruhani ımruj Tehronədə Mığovimətiyə İğtisod və Diyon İnkişof nomo bıə iclosədə Suriyədə kimiyabiyə silohonku istifodə karde hadisə barədə həğiğəton peydo karde xoto qıləy be tərəfə qrupi ijən təhğiğ əkə kamissiya soxte tələbış kardə ijən de təkid karde bə ım nuktə ki bə i bıə milləton təşkilati raporton əsos Suriyə dıvlət və hərbion ixtiyorədə hiç kimiyabiyə silohi ni votışe: ğeyd bıə həğiğət peydo əkə kamissiyaədə bəbe Amerkə uzviyətış nıbu ijən şəffof təhğiğ bıkə ki Suriyədə kimiyabiyə silohon kom məntəğədə iyən kom dastəku istifodə bıə və ya xot ki vardəşe.

Ruhani soalış kardə ki çı Amerkə jıqonə təcavozon əv həm bə qıləy mıstəğillə kişvəri hucum karde bəhonəon çiç heste təkidış karde: ısət Suriyədə həmmə terroriston çı Amerkə ım be abro-həyo əkə zalimanə təcavoziku şo bən ki de beynəl xalğiyə ğanuni ləğv karde vasitə əncom bıə.

Ruhani ijən bə Trampi tojə sıxənon de terrorizm mubarizə barəde işorəş kardə və votışe: əqə Amerkəvıjon ıştə sıxənonədə duəvuj nin boçi i minə hərəkətədə binoşon karde bə terroriston komək karde ijən Suriyə hərbiyonışon bombardımon karde.

Amerkə, zinə sıbi faxti de Suriyə Edleb şəhri kimiyabi şək-şobhəinə hucumi bəhonə miyonə diyoku 59 qılə rəkıtış bə Suriyə Homs şəhri Əlşəirat baza ğandışe.

Im hucumədə 9 qılə çı Suriyə ğeyri hərbion əcumlə 4 qılə hırdənon kışte və 7 nəfər zəxmin bıən.

Suriyə dıvlət vey kərə, ıştə hərbion tərəfiku kimiyabiyə hucumonış rəd kardə.