Şəhid Rəyisi jimon
Şəhid Rəyisi jimon
Həşi 1360-ə(Milodi 1981-)sor be ki,mınofiğon nomo terroristə dastə de xarici dışmenopn himoyə bə İroni devlətmerdon terrori səmt dastışon ğande,Şəhid Ayətullah Beheşti çe Ədliyyə Ğıvvə iminə rəyis,Şəhid Rəcayi İroni dıminə prezdent iyən co hafto dı nəfər çe İslomi Şurə Məclisi nımoyəndəonku və həmçinin çe İroni beqınoə millətiku ziyodə insonon həmonə sori de mınofiğon təvəssuti bə şəohdəti məğami rəsin.
Ayətullah Seyd Məhəmməd Huseyn Beheşti çe İron İslom Respublikə çe Ədliyyə Ğıvvə iminə rəyis ıştə şəhodəti bənav ıştə oxonə sıxanonədə jıqoş votəbe:”əmə ijən bəpe icozə mədəmon mıstəməkəçiyon iyən istemorqəron ıştə odəmon boəmə bıvıjnon iyən deçəmə mərdumi sərnıvışti hənəkkon.səy bıkəmon bəçəmə məktəbi təəhhudış bıə kəson iyən deçəmə mərdumi tale iyən sərnıvışti hənək nıkardə kəson səçın kardey bıbon”.
Şəhid Beheşti zıneydəbe ki,millət ıştə tale iyən sərnıvışti bə dast qəteyro,bəpe bə İslomi məktəbi təəhhudış bıə iyən bo bə mərdumi xıdmətiro aşığ bıə kəson boştə koon idorə kardero rəyis bıvıjnon.ə yolə şəxsiyyət bo İslomi Respublikə nizomi idorə kardero bıə niyozon təmin kardero qıləy məxsusə təlimi kursış bərpo kardeşe və bo kişfəri koon idorə kardero mınosib bıə kamə ədədədə bıə tələbəon,bəçəy nəzə əsos vıjniyə bin ki,çəvonku həmməysə çokə qıləyni həm Seyd İbreym Rəyisus-Sadati be.həmonə kəs ki,ıştə oxonə şəvış Ordibeheştə manqi 30(milodi mayə 19-ə)ruji Şərği Ozoboyconi Vərzəğan məntəğədə de saxtəti dəvardey bıə iyən dastnırəsə əraziyədə ,çe voşi ovi jiyədə iyən 16 dərəcə mənfi selsiyədə və ıştə missiyə iyən məmuriyyəti bə vırə rosnə holədə be,əmmo çəy millət ıştə kəonədə çe qıləy komilə əmniyyət iyən səloməti dılədə boçəy səlomətətiro dıvo kardedəbin.
Əv,həjdə sinniku bə ın roy qəmış noə be,həmonə zəmon ki,İroni İslomi İnğılob bə səbarzəti rəse,ibtido bə alimonku qıləyni dəvəti əsos,bo fərhənqi koon əncom doeyro bə Məscide-Suleymoni şəhri şe.vist sinnış hestebe ki,bənə bə Kərəci prokurori məğami səçın be.çəy bın şəhrədə bıə mırəkkəbə vəzyəti bə səhmon dənoey mevğıyyət səbəb be ki,dı sori bədiqə Həşi 1361-ə sori de Kərəci şəhrıstoni prokurori məğamiku əlovə,çe Həmədoni şəhri prokurorəti məğamışon həm bəçəy ehdə noşone.çəy həmzəmon dıqlə məsuliyyəti bəştə ehdə peqətey,bo qıləy mıddəti dəvomış pəydo karde tayinki, Əv,bənə Həmədoni şəhri prokurori unvoni təsdığ kardey be və Həşi 1361-1363-ə soron bın postədə xıdmətış karde.
Qırd bın soronıədə əv bənə ıştə ustod Şəhid Beheşti fəğət bo bə milləti xıdmət kardero fik kardedəbe və çe har qılə hay-kuyku bə diyəro iyən çe cokəson sıxanon mığobilədə fəğət deştə koy məşğul bin və əməl kardedəbin.çəy praqmatizm iyən əməl kardey və bo xıdmətiro bıə şevğ be ki, səbəb be bəştə ehdə peqətə bo İslomi Respublikə nizomi bın dəvardə dı sor nimə prezdendəti devrədə dıjdə koon bə vırə bırosno.qıləy proje iyən proyekton ki,cokəson çəy barədə fəğət sıxanışon votəbe iyən cokəson çəy əncom doey barədə ociz bıə çiyon,əy deştə qırd zu və ğudrəti əncomış doe.
