Dəhvul-Ərzi ruj

Dəhvul-Ərzi ruj

Pəyğombəre-Əkrəm(s) hamyedə:”innə lirəbbikum…bərosti şımə jimoni dırozi şımə pərvərdıqori tərəfiku nəsimə voon qıniyedə.aqah bıbənən! ıştəni çın nəsimon mə`rəzədə ğərol bıdənən ki,ğasbu səbəb bıbu ki, bədbəxti dayimi surətədə şıməku bə diyəro bıbu”.

Zilğə`ədə manqi 25-ə ruj de”Dəhvul-Ərz” ya həmonə zəmini hevujəti ruji nomi məşhure ki,ım ruj həm çə nəsimonku qıləyniye.qıləy nəsim ki,sori fəğət iqlə rujədə əkəson ki,ıştə con iyən dılışon çəy mə`rəzədə ğərolışon doə,bəçəvon dılon nəvaziş doydə və bəvon qıləy nığılə şoyvonəti iyən oroməti baxş kardeydə.

Tıbğe rəvoyət Xıdovənde-Mıtəol zəminış Zilğə`ədə manqi 25-ə ruji ısətnə Kəbə Kə palu bıə vırədə hevujış karde və həmonə vırəş bo insoni jimon iyən oromətiro bıə vırəş ğərol doe.Xıdovənde-Aləm Kərimə-Ğıroni kali ayəonədə bə ın məsələ işorə kardedə.çoko ki,Naziati mıborəkə surə 30-ə şərifə ayədə jıqo hamyedə:”Vələrzə bə`də zalikə dəhaha.zəminış çəy bədiqə hevujış karde”.

Məcidə-Ğıroni əksər mıfəssıron “Dəhaha”-şon bə qıləy devrə bino bıey işorə zıneydən ki,zəmin de Mığəddəsə Həxə zoti nəzə çe osoyiş iyən oroməti mərkəz ğərol doey be.bəvədə ruon cari be iyən şuləon bə cuş omin,pərəndəon doon xolə barzə vırədə de Xıdovəndi təsbih iyən təmcidi koy məşğul bin.zəmin de bandı-kuon əzəməti ki,bənə qıləy barzə mıxi bəy kuyə bıə,bo insoni osoyişiro qıləy qofo be.liza ın ruji dıjd qətey,İlahi oxoşnıbə neməton qiromi iyən dıjd qətey mənoədəy ki,tədrici formədə bə ın zəmini kurə əto kardey bıə.

Həlbəttə,bın ruji coqlə hodisəon həm bə əməl omə ki,çe islomi torıxədə çəy əhəmiyyətış vey kardə.min cumlə:Həzrət İbreymi(ə) milod,Həzrət İsa-Məsihi(ə) milod və Rəsuli-Əkrəmi(s) de Vido Həcci niyyəti Mədinəku bə Məkkə səmt hərəkət ki,bın səfədə Həzrət Əli(ə),Həzrət Fatməye-Zəhro(s) iyən çe pəyğombəri qırd xanımon iyən səhobəon əksər həm de ə həzrət bə ico bin.

De qırd ın hodisəon bə ico,həmmə çiysə bənav,Zilğə`ədə manqi 25-ə ruj de”Dəhvul-Ərz” ya həmonə zəmini hevujəti ruji nomi məşhure.Həzrət İmom Əliku(ə) rəvoyət bıə ki,hamyəşe:”osmoniku bə zəmin nozil bıə iminə rəhmət çe Zilğə`ədə manqi 25-ə şəvi bıə.ikəs ki,ın ruji rujə bıqəto iyən şəvi de ibodəti dəvordıno,sa sor de çəy rujon rujə iyən şəvon de ibodəti bıə qıləy ibodətış bəbe.har qıləy dastə ki,bın ruji boştə Yolə pərvərdıqori zikriro qırdə bıbon,əvon volo-volo bıə zəmonədə çəvon tələbon doey bəbe”.

Dəhvul-Ərz çə ço rujonku qıləyniye ki,həmonə ruji rujə qətey ziyodə fəzilətonış heste.həmonə ruji rujə səvob de hafto sori rujə səvobi bərobəre iyən bə qıləy rəvoyəti əsos,hafto sor qıno kəfforəy.bo ın ruji çe rujəsə əlovə,dıvo,ğosl iyən nımoj həm zikr bıə.ın nımoj dı rıxəte və har rıxətədə çe Həmdi surə bəpeşt  penc kərə Şəmsi surə handey beydə və çe nımoji səlomi bədiqə La həvla …..