Nəhcul-Bəlağə pand iyən hikməton

Nəhcul-Bəlağə pand iyən hikməton

Və ğalə(ə):Kəm min mustədrəcin bilihsani iləyh…..veyə şəxson ki,de Xıdovəndi ehsoni qədə-qədə bə həxə əzobi nez bıən və bə bəştə qınon puşniye xoto məğrur iyən bə dast dənoey bıən iyən bə (mərdumi) çəvonku bıə tarif və mədhi xoto,bə fıtnə iyən xərobəti eqıniyən.

Əmirəl-Muminin İmom Əli(ə) Nəhcul-Bəlağə 116-ə hikmətədə jıqo hamyedə:”Kəm min mustədrəcin.... veyə şəxson ki,de Xıdovəndi ehsoni qəd-qədə bə həxə əzobi nez bıən və bə bəştə qınon puşniye xoto məğrur iyən bə dast dənoey bıən iyən bə (mərdumi) çəvonku bıə tarif və mədhi xoto,bə fıtnə iyən xərobəti eqıniyən və Xıdovənd hiçkəsi bənə mehlət doey(neməton dəvom iyən əzobi tərk kardey) bıə çi imtovonış kardəni”.

İstidroc qəm bə qəm giriftor kardey mənoədəy.İlahi adətonku qıləyni de bədə ko soybon mığobilədə istidroce.bın mənoədə ki,əvon harçi bədə koon vindedən,ijən çəvon neməton ziyod beydə və əvon ıştən zıneydənin ki,qırd ın neməton boçəvon sə çın ləzzəton dılədə tasboney iyən əvoni əyo ğərğ kardey xotoye.de ın tərtibi əvon de tədrici ıştə hidoyəti istedodi çe dasto doydən iyən qıləy zəmon omeydə rəseydə ki,çəvonku qırd fərsəton sıey beydə.bəçəy xoto votey beydə ki,nemət həddiku ziyodə addi bıə zəmnoədə,vey mığət bıey lozıme iyən bə bandəçəti şərayiti ziyodə rioyət kardey bıbu və çe istidrociku bə Xıdo pənoh bardey bıbu.

Ənami mıborəkə surə 44-ə şərifə ayədə jıqo handedəmon:”Fələmma nəsu….qıləy zəmon ki,bəvon pand doey bıə çiyon çe viro bekardeşone,əmə harcurnə neməti bəvon bəçəvon dimi oj kardemone tosə qıləy zəmoni ki,(komilən) bəvon doə bıə çiyon xoşhol bin.ğəflətən,əvonımon bə əzob giriftor kardemone iyən bə ikkərə noumu bin”.

Xıdovənd “Səttarul-Uyube” və çanədə ki,mumkine ıştə bandəon qınon puşniyedə ta ğasbu əv tobəko iyən bə həxə roy səmt oqardo.çe Xıdovəndi ıştə bandəon həxədə ın pardə puşniye harçənd zohirədə neməte,əmmo insoni bənə məğrurəti bıə coqlə bəlo mıbtəlo kardey bəzıne.Əmirəl-Muminin İmom Həzrət Əli(ə)  bın hikmətədə bıə kəlom ıme ki,hamyedə:(və məğrur bissitri ələyh)əkəson ki,bəçəvon fırsemonon punhon iyən puşniye dəlili xoto,məğrur bıən iyən bə dast dənoey bıən:quya və jıqo bızın həmınə mətləbe.

Kərimə-Ğıron çın qrupi həxədə Ali-İmrani mıborəkə surədə hamyedə:”vəla yəhsəbənnəl-ləzinə….kofiron hiçvaxti qımon nıkon qıləy mehlət ki,bəvon doydəmon,bəçəvon nəf iyən xəyriye.fəğət bə ın səbəbi xoto əmə bəvon mehlət doydəmon ki,(ehyanə oğo beydənin)ıştə qınon ziyod kardedən və(nəhoyətən) boəvon qıləy xarəkə əzob heste”.liza əve ki, İmom Əli(ə) hamyedə:”və məbtəliyəllahu... Xıdovənd hiçkəsi bənə mehlət doey(neməton dəvom iyən əzobi tərk kardey) bıə çi imtovonış kardəni”.