Həxaməneşi(Əhəməni) lovhəon

Həxaməneşi(Əhəməni) lovhəon

Əhəməni lovhəon

De Mədəni İrson Qiromi qətey Haftə mınosibəti bə Yolə Daryuşi zəmoni ayid iyən təğribən Milodiku 509 sor bənav bıə Həxaməneşi lovhəonku 162 qılə hissə Tehrono çe Ğədimə İroni Muzey əsliyə salonədə bə nımoyiş noey be.Əhəməni hukuməti devron çe İroni torıxi devroni muhimmə zəmononku qıləyniye və bın devronədə Əhəməni ya Həxaməneşi imperiyə şərğiku de Hindıstoni və çe ğərbiku tosə şərği Avropə iyən Afrikə şimoli hissəon əhotə kardedəbe.Əhəməni hukuməti rujiqor iyən devroniku çe arxeoloqon pəydo kardə həmməysə vey muhmmə çi,çe Təxte-Cəmşidi kolleksiyə jiyədə bə Parsi ğovmi sivilizasiyə iyən bə torıxi hodisəon ayid bıə çandə da həzo lovhəon kəşf bıeye.In əsəron bə sarayon,salonon məcmuə iyən bə Həxaməneşi imperiyə poytaxt(Perespolisi) obyekti kompleksi şomil beydə və şe Şirozi şəhri şimol-şərğ 46 kilometryiədə iyən çe Fars ostani Mərvdəştədə vağe bıə.Təxte-Cəmşidi binon kolleksiyə de Yolə Daryuşi təvəssıti soxtə bıə iyən çəy əsliyə nom Parsəy.Miləli dərvozədə bə Xəşayarşahi kətibə əsos,ehtimolən Milodiku 518 sor bənav və Daryuşi əhd iyən zəmonədə soxtə bıə….

Xosə duston! De Almaniyəvıjə arxeoyoloq bıə Ernst Emil Herzfeldi milodi 1933 iyən1934-ə soron Təxte-Cəmşidi sarayədə kandə arxiyoloji kandemononədə,soğaliku bıə çandə da həzo lovhəon dıqlə otağədə pəydo be ki,de tərtibi bənə qıləy kitobxonə dəçıniyə bıəbe.ın lovhəon de İroni bə zəmon bıə devləti roziyəti bo mıtoliyə iyən bərrəsi kardero bə Çikaqo unversteti əmonət doey bıəbe.lovhəon 50 qılə çuyə sondoxədə çe İroni cənubədə bıə Buşehri bəndər ya portiku bə Amerkə vığandə bıəbe.çə həmonə lovhəon peyo çandə dırozə soron bərrəsi iyən təhğiğoton əncom doey be iyən nəhoyətən çəvon mehtəvo iyən funksiyə ruşin be və bə antik İroni bın coğrafi noxtədə dəvəşə mədəniyyəti mevcudəti qıləy təsdıği mıhi qıniye…