Çordəminə devləti xarici siyosət
Çordəminə devləti xarici siyosət
Çordəminə devləti rəyis Məsud Pezeşkiyan çandə kərə təkidış kardə ki,çe İroni devləti xarici siyosət reqiyonal iyən beynəlxalğ ərsə və arenadə de hamsuyə,məntəğə iyən mısılmonə kişfəron mınosibəton zumand kardey məhvəriyyətədə milli mənafe təmin kardey və həmçinin çe Fələstıni məzlumə milləti ideyalon iyən mığoviməti məhvəri himoyə kardeye.Məsud Pezeşkiyan İslomi Şurə Məclisədə bıə ğəssəm hardey mərosimədə ımış bəyon karde ki,hamsuyə kişfəron bəpe ıştə mənafe lır kardə rəğobət iyən ziddiyyətədə bə hədər nıdon.İroni prezdenti əlovəş karde:”çımı devlət qıləy zumandə məntəğə tələb bəkarde.qıləy reqiyon ki,bəvədə həmmə kişfəron kardey bızınon boştə ixtisodi,inkişofi,ozavziye iyən ayəndə rujon jimoni çok beyro həmraəyəti əncom doeyro qəm peqəton”.
Im qıləy holədəy ki,İroni 7 qılə marziyə hamsuyə və 10 qılə sahili hamsuyəş heste və behisobə fırsətonış bo İroni diplomatiyə,ixtisod iyən fərhənqi hozzış kardə və məxsusən ki,İroni fərhənq ziyodə hamsuyə kişfəronədə ijən həm cərəyonış heste və qıləy zumandə huzur və iştirokış heste.bə İroni vey barzə məğam iyən rəsmi şəxson sıxanon əsos,İroni xarici siyosəti ərsədə səy kardedə i tərəfo de həmmə kişfəron ıştə rabitəonədə qıləy balans icodko və co tərəfiku xarici siyosətədə de ixtisodi mənfəəton təğib kardey cəhd kardedə de hamsuyə iyən reqiyonal kişfəron rabitəon hevuj kardeyədə təadul iyən balansi,çe İron İslom Respublikə ixtisodi mənafeyon təmin kardeye.ın bın mənoədəy ki,dınyo mıxtəlifə noxtəonədə kişfəron boştə mıttəfiğon iyən duston vıjniyero,qıləy səçıni həxışon heste.əmmo ıştə hamsuyəon barədə bə jıqo qıləy həxı malik nin.çıro ki,bənə coğrafi iyən mədəni mıştərəkə məsələon ın ko boəvon mıəyyənış kardə.jıqo qıləy şərayitədə çe İron İslom Respublikə xarici koon vəzir Əbbos Ərağçi çe İroni deştə hamsuyəon ziddiyyəton miyoniku bardey barədə bıə nəzə elon kardey,bə İroni sabiğ prezdent mərhum İbreym Rəyisi devləti xarici siyosəti dilpomatiyə sənibəton təkid kardeye ki,de hamsuyəon ıştə rabitəon hevuj kardey,bo Ğərbi Asiyə iyən dınyoədə dustəti iyən vəhdəti ziyod kardero bıə qıləy qəm be.
