Amerkə çı ətomiyə təvafuği ruf və mətni ləğvış kardə.

İroni xarıci vəzir ujnən bə Amerkə bədəhdion iyən ətomiyə təvafuği ləğv karde təkidış kardə.

İroni xarıci vəzir, Muhəmməd Cəvad Zərif bə Amerkə prezidenti sıxanon reaksiya nışoş do ijən ıştə Tuvitter səhifədə nıvışteşe: Amerkə detosə bə ısət həm çı ətomiyə təvafuği ruf və mətni ləğvış kardə.

Amerkə prezident Donald Tramp zinə sepiyə binoədə de İtaliya i minə vəzir xəbəiyə iclosədə votəş be: İron bə ətomiyə təvafuği ruf əməl kardəş ni.

Çı Trampi iddio qıləy vəziyətdə bəyon bıdə ki ətom enerji beynəl xalğiyə təşkilat iyən i bıə milləton təşkilati Əmniyyət Şura raporton və ğətnoməonədə təkid və işorə bıə ki İron bəştə həmmə əhd-vəzifəon əməlış kardə.

Avropa i bemoni xarıci siyasi məsul xanım Muqerini həm tojədən bə ım nuktə təkidış kardə ki ətomiyə təvafuğ bə beynəl xalğiyə iştimaeiyəti aide ijən votışe: ətomiyə təvafuğ qıləy təvafuğ ni ki 2 qılə kişvəri miyono imzo bıə be bəlkəm qıləy beynəl xalğiyə təvafuğ heste ki çəy dılədə şəxsi nəzəron və ya xot əvəz əkə şərayeti dənoə imkonış ni.

İron və 5+1 qrupi kişvəron miyono ətomiyə təvafuğ 2015 minə sori İyonə manqədə imzo ijən 2016 minə sori Yanvariku icra bıə.