Fəhləon cəmyəti sabitəti iyən dəvominəti sutunonin.

İmom Xameneyi bə koqəri sinfi hartərəfinə dastəq;fəhləon cəmyəti sabitəti iyən dəvominəti sutunonin.

İmom Xameneyi şanbə ruji maştəvoni de Ko iyən Koqəron Haftə mınosibəti de çandə həzo fəhləon bıə didoədə bo istehsoliro sərmoyə şuoron bə həyot dəvordıneyro bə koqəron ciddiyə dığğətış həmməysə muhimmə ko kapital və çe cəmyəti sabitəti iyən dəvominəti sutunonku qıləyniş hisob karde və ğeydış karde:İroni mol və materiyalon istehlok kişfərədə bəpe bə qələy mədəniyyəti təbdil bıbu.həlbəttə ki,çe fərhənqi oney kəno,bəpe çe bumiyə molon keyfiyyət həm barz kardənin bıbu.

İslomi İnğılobi Rəhbər İronədə de çandə həzo koqəron bıə didoədə ko iyən ko məsələonış de kişfəri tale anqıl zınəşe və çı ko iyən zəhməti erjon əhəmiyyəti ifodə kardə holədə votəşone:Əzizə koqəron bəpe ıştə ğədri bızınon,çunki ğarətiku, mıftəxorətiku,bə cokəson moli ğəsd kardeyku bə diyəro,həmən çe cəmyəti dıqlə muhimmə məhsul və erjinə niyozon yəni istehsol iyən xıdməti pərdaxt kardə holədə jimoni rızğ iyən həlolə nuni kəsb kardey lozıme ki,çe koqəri ım erjin iyən muhimmə ko insoni noxteyi-nəzəku Yolə Xıdo nəzdədə qıləy çokə ko hisob beydə.

Pars Tudey bə Ali Rəhbəri Aparati informasiya sayti istinodən doə məlumoti əsos,İmom Xameneyi çe ko erji izoh kardə holədə votəşe:"ko çe insoni jimoni idorə bey və dəvominəti əsosə sutune və be əv,həyot iflic bəbe.bəçəy xoto həm elm və sərmoyə çe koy bə jimon dəvoredıneyədə muhim və təsirin həm bıbu,zəhmətkeşon nıbə holədə hiç qıləy ko bə əməl nibome iyən ım koqəre ki,bə sərmoyə həyot baxş kardedə".

Ə həzrət,bə ımsornə sori “bo istehsoliro sərmoyə” nom noey işorə kardə holədə,koqəronış muhimmə istehsoli kapital, cəmyəti sabitəti iyən dəvominəti sutunonku qıləyniş hisob kardə.Əv,moliyyə sərmoyə çe fəhləon irodə və hınə nıbə holədə bə hiç qıləy ko bənav nışey təkid kardə holədə əlovəşon karde:“Bə ın səbəbi xoto həm cəmyəton dışmenon,ə cumlə həm çe İslomi Respublikə bədxahon İslomi Respublikədə ko sinfi çe ko kardeyku oqətey və çəvon etıroz kardeyışon piyedə.

İnğılobi Rəhbər çe İnğılobi əvvələdə bə kommunistə hərəkoton bo istehsoli oqətey və bə iflicə vəzyəti dənoey səyon işorə kardə holədə voteşe:“Eyni ənqizə və motivon ımruj həm mevcude,lakin həm bə ruji,həmən ımruj çəmə koqəron ğoym mandə holədə ıştə mıştonışon bəçəvon qəvi jeşone.”.

İmom Xameneyi bəştə sıxanon dəvom doə holədə,bə bəzi bumiyə molon vey çokə keyfiyyəti işorə kardə holədə ğeydış karde: Boənən,bumiyə istehsol nıbə molon istisno bıə holədə,ımi bə ironıjon çe İroni molon istehlok kardə mıştərəkə mədəniyyəti təbdil bıkəmon.

İslomi İnğılobi Rəhbər həmçinin ıştə nıtği oxonə baxşədə bə Fələstini məsələ viro bekardero səy kardə ğərəzinə siyosəton işorə kardə holədə votəşone:Mısılmonə xalğon de mıxtəlifə şayiəon iyən bemənoə sehbəton pevolo bey,bəpe iştimoyi rayi Fələstin iyən Ğəzzə məsələ və çı seonist rejimi cinoyətonku co bey icozə nıdon.

Ə həzrət,çe dınyo bə sehyonist rejim iyən bəçəy himoyədoron ələyh bıə mığovimətış vocib zıne və voteşe:Amerkə həyğətən həm bə sehyonist rejimi dastək doydə və siyosəti aləmədə fərğinə şərh doey bıə bəyonoton həm doey bıbu,realəti ımeki, Fələstin və Ğəzzə məzlumə milləton fəğət de sehyonist rejimi ne,həmən de Amerkə və İnqilostoni dimbədimin və əvon çe cinoyəton iyən ğətlı-ami navi qətey əvəzi,de siloh vığandey və imkonaton zumand kardə holədə bə cinoyətkoron koməq kardedən.

İslomi İnğılobi Rəhbər təkidışon kardə ki,kali şuoron,sıxanon və dəvardə hodisəon bə Fələstin məsələ çe viro bekardey boyis bıbu,bə yodışon dənoe:“De Xıdovəndi lutf iyən izzəti Fələstin bəsə sehyonistə işğalçiyon peyo bə ğələbə noyil bəbe və botılə çand rujnə cərəyon bə oxo bərəse.çoko ki,çəvon Suriyadə vində koon,çəvon zumandətiyədə ni,bəlkəm çımi əks ım,çəvon zəyifəti işorəy və əvon həni həm zəyif bəbeyn.

İmom Xameneyi oxoyədə ıştə umudəvo beyış bəyon karde ki,İroni mərdum və muminə xalğon iruj Fələstini bəsə çın sərzəmini ğəsb kardə kəson sape bıə səbarzəti şoyd bəbeyn.