Pezeşkiyani de Misri prezdent Əbdulfəttah Əs-Sisi miyono telefonə təmas

İron İslom Respublika prezdenti de Misri prezdenti miyono bıə telefonə qəp

İron İslom Respublika prezdenti de Misri prezdenti bıə telefonə qəpədə çe seonist rejimi bə Ğətəri məmləkəti zidd bıə cinoyətkorə təcavuzi işorə kardə holədə,çın rejimi bə mısılmonə kişfəron ələyh ğeyri-insoni hərəkəton dəvom kardey navi qəteyro bə İslomi umməti ğəti və vohidə mevğeyyəti zəruri bey işorə kardəşe.

Pars Tudey bə ironi Tele-Rədyo xəbə aqentəti istinodən doə məlumoti əsos,İron İslom Respublika prezdent Məsud Pezeşkiyan de Misri prezdent Əbdulfəttah Əs-Sisi bıə telefonə qəpədə bə Ğahirə kə soybəti kardey və çın kişfər de İron İslom Respublika bıə nuvə mızokirəon və çe İslomi Respublika səyon bə dast omeyədə nışon doə fəol roli xoto ıştə səmimi təşəkkur və mınnətdoətiş bəyon kardə.

İron İslom Respublika prezdent çe seonist rejimi bə Ğətəri məmləkəti zidd bıə cinoyətkorə təcavuzi işorə kardə holədə,çe İslomi umməti bo ın rejimi bə mısılmonə kişfəron ələyh ğeyri-insoni hərəkəton dəvom kardeyro bə İslomi umməti ğəti və vohidə mevğeyyəti zəruriyyəti işorə kardə holədə əlovəş kardə:“seonist rejimi rəftor nışon doydə ki,ın rejim çe har qıləy çərçivə iyən ğanuniku bə kəno və har qıləy zəmon irodə bıko və hiç qıləy çi nəzədə nəqətə holədə bə har qıləy kişfəri ki,bıpyişe həmlə kardedə.jıqo qıləy şərayitədə İslomi dınyo zəruriye ki,bəpe qıləy ğəti və metəbərə mevğe bıvıjno”.

Pezeşkiyan çe Misri prezidenti de ın cinoyətkorə əməlon məhkum kardey anqıl çəy oj iyən ğətiyə mevğeyonış barz qəte və umudəvo bin ki, İslomi ummət bə Kərimə-Ğıroni tevsiyəon və bə Həzrət Pəyğombəri(s) təlimon sadığ mandə holədə,bənə qıləy vohidə umməti fəoliyyət nışon bədoe və çe seonist rejimi har qıləy təcavuzi vəy bəqəte.

İron İslom Respublika prezdent həmçinin çe İron İslom Respublika bo Misri prezdenti ğəbul kardeyro hozzıəti bəyon kardə holədə votəşe:Çəş kardey beydə,nezə ayəndədə çe dıqlə kişfəri barzə vəzifəynə şəxson dıtərəfinə əloğəon hevuj kardey və İslomi dınyo ibemoni zumand kardeyro həlli roon həxədə fiki mubadilə və şəxsən məsləhət kardey imkoni bə dast bəvardeyn.

Misri prezdent Əbdulfəttah Əs-Sisi de Məsud Pezeşkiyani bıə təmasiku ıştə məmnunəti ifodə kardə holədə,əvış bə İron İslom Respublika de Beynəlxalğə Atom Enerji Aqentəti miyono bə dast omə roziyətiyon xoto təbrikış karde və ın roziyətiyon çı İron İslom Respublika reqiyonədə sabitəti,sulh və əmniyyəti muhafizə cəhətədə bıə səmimiyyət və xoşə niyyəti barizə nışonəş hisob kardə.