Pezeşkiyan:Reqiyonal əmniyyət çe seonist rejimi rəftoron ğıboni bıə

İron İslom Respublika prezdenti votəşe:Amerkə dayima de nuyə bəhonəon bo sazişi bə forma dəşey navi qəteydə və həyğət ıme ki,Amerkə bə zumandə İroni tov vardey zıneydəni.

Pars Tudey bə İRNA istinodən doə məlumoti əsos,İron İslom Respublika prezdent Məsud Pezeşkiyan çe Nyu-Yorki səfəku oqardey bədiqə,çe İbıə Milləton Təşkiloti 80-ə Sər Assambleyaədə çın muhimmə səfə nəticəon izoh doə zəmon,bəştə iştirok və nıtği işorə kardə holədə votəşe:Bın didoədə İron İslom Respublika mevğeyon oşkoə şikilədə bəyon iyən ifodə bıə və sehyonist rejimi de AİŞ və Avropa bəzi kişfəron bəisə himoyə reqiyonədə bıə cinoyəton təsdığ kardedə.

Pezeşkiyan bə Ğəzzə şestı penc həzosə ziyodə beqınoə insoni şəhodəti və bə çandə həzo insoni bənə ov, hardemon və damoni bıə vey əsosə insoni ehtiyoconku məhrum bey işorə kardə holədə votəşe:De insonon,jenon və hırdənon həxon mudafiyə kardey iddiyo koməq kardero roon bastey,ğərəz ojə-oşkoə ziddiyyət və beynəlxalğə hiyləqərəti co çi hi.

İron İslom Respublika prezdenti əlovəş kardə:Imruj Ğəzzədə bə əməl omə çiyon və çı seonist rejimi reqiyonədə bıə rəftoron sabitəti və əmniyyəti praktiki surətədə bə təhlukə jiş bardə və bın miyono İMT Əmniyyət Şura i kərə həm bıbu bə ın rejimi əleyh qıləy ğətnoməş ğəbul kardəni;çunki qlobal zuon struktur bə realə ədoləti real bey mane beydə.

Pezeşkiyan bə de mıxtəlifə kişfəron lideron və rəsmiyon,ə cumlə həm bə Fransa,Norveç,Finlandiya,İsveçrə prezdenton və de Avropa Şura sədri bıə vindemoni və diyaloqon işorə kardə holədə votəşe:Bın mızokirəonədə İroni mevğeyon oşkoə şikilədə izoh doey bıə.Avropa tərəfon veyni ıştə ehandımononədə bə seonist rejimi hərəkəton ələyh beşon həm,əmələdə hiç qıləy oqətə bıə tədbir muşahidə beydəni.Lakin Avropadə bə ın rejimi dastək doə hukuməton zidd xalği etırozon ləpə nəzədə qətənin bıə qıləy tendensiyay.

İron İslom Respublika prezdent ıştə nıtği co qılə hissədə bə “snapbak” məsələ işorə kardə holədə bəyonış kardə:“Avropavıjon mızokirəonədə İroni de Beynəlxalğə Atom Enerji Aqentəti bıə həmkoəti və de nuvə fəoliyyəton anqıl şəffofəti təmin kardey hozzıəti təkid kardemone”.

İron İslom Respublika prezdent bə Amerkə NBC xəbə şəbəkə musahibə doə holədə,de İroni nuvə proqrami və beynəlxalğə əloğəon anqıl mevğeyış bəyon kardə.

Bə Pars Tudey doə məlumoti əsos,bə de Beynəlxalğə Atom Enerji Aqentəti təftişon anqıl məsələ işorə kardə Pezeşkiyani votəşe:“Əqər əvon İroni de bə nuvə silohi soyb beyədə mıttəhəm bıkon,əmə bə nuvə obyekton osə ğandey icozə nibədomon”.

Əv,de qıləy sıvoli bəyonış kardə:"Əvon snapbaki aktiv kardey bədiqə bəçəvon osə ğandey ko çəmə icozə doey çokonə çəş kardedən?" və əlovəş kardə:Əvon bə Aqentəti və çe İroni həm uzv bıə NPT ğaydəon və beynəlxalğə çərçivəon bob hərəkət kasrdeyışon piyəni.

İron İslom Respublika prezdent həmçinin bə İroni nuvə obyekton bıə hucumi işorə kardə holədə votəşe:sehyonist rejimi bə Aqentəti nəzorəti jiyədə bıə atomi mərkəzon hucum kardey həxış ni,lakin əvon bə beynəlxalğə huğuği zidd hərəkətışon karde və beynəlxalğə təşkiloton həm bə çın hərəkəti vədə tamışon je .

Pezeşkiyani əlovəş kardə:Əmə nə canqi dumomon,və nə həm muharibəku tarsımon heste.Əv,de AİŞ hukuməti siyosəton anqıl xəbərdorətiş kardə və votəşe:“Tramp çe sulh icod kardeyku qəp jeydə,lakin çəy qətə ro bə qırd reqiyoni otəş bəjəne”.

İron İslom Respublika prezdent,Ğəzzədə bə əməl omə cinoyəton işorə kardə holədə ğeydış kardə: Şımə zıneydon boçi Ğəzzə insonon bombardımon beydən və qırd beynəlxalğə təşkiloton həm bımi tam jeydən və hiç qıləy çi kardey zıneydənin?.çımi səbəb Ğəzzə əhali bə mudafiyə zu malik nıbeye.