Pezeşkiyan:İslomi kişfəron bə vohidə daston peqardey çəvon hartərəfinə əloğəon hevujəti qirovədəy

Məsud Pezeşkiyani təkidış kardə ki,İslomi kişfəron bə vohidə daston peqardey çəvon hartərəfinə rabitəon hevujəti qirovədəy

İroni prezdenti təkidış kardə ki,çe İslomi kişfəron ibemon qırd sahəonədə rabitəon hevujəti tələb kardedə və çın vəhdəti sayədə seonist rejim bo cinoyət kardero cəsorət nibəkarde.Məsud Pezeşkiyan İron İslom Respublikədə çe İndoneziya nuyə səfir təyin kardə bıə Roliyan Şah Suamirati etımodnomə ğəbuli mərosimədə de İslomi məmləkəton həmkoəti zumand və hevuj kardeyış çe İroni xarici siyosəti əsosə məhvər hisob kardə holədə votəşe:Bə İslomi təlimon əsosən,əmə mısılmonə kişfəron ıştə bıvon hisob kardedəmon və bovə kardedəmon ki,əmə bəpe çe İslomi dışmenon vədə deştə vəhdəti mığovimət nışon bıdəmon.

Əv,bo ın məğsədi real beyro İslomi məmləkəton miyono qırd elmi,mədəni,ixtisodi,siyosi,sosyal və əmniyyəti sahəonədə əloğəon hevujəti qirovədəş hisob kardə və təkidış kardə:Əqər İslomi millət həmray bıbon,seonist rejim hiç vaxti bə məzlumə Fələstini xalği zidd xəcolət vardə cinoyəton kardey və bə diqər kişfəron ələyh təərruz iyən hucum kardey cəsorətış nibəbe.