Hiç qıləy təhdid çe İroni əmniyyət və mıstəğiləti darıştey nibəzıne
İron İslom Respublikə Ləşkəri Sər Ğərorqo rəyis və koordinatori muavini votəşe:Hiç qıləy təhdid çe İron İslom Respublikə əmniyyət və mıstəğiləti darıştey nibəzıne.
Bə Pars Tudey doə məlumoti əsos,İron İslom Respublikə Ləşkəri Sər Ğərorqo rəyis və koordinatori muavin kontr-admiral Həbibullah Səyyari cımə ruji İmom Əli(ə) Zabiton Unversiteti tələbəon vədə nıtğ kardə holədə,bə Əmirəl-muminin Əli(ə) əmri işorə kardə holədə votəşe:"Əqər şımə sulhon piyedəbu,ıştəni bo canqiro hozzıkənən”.ım həkimonə əmr nışon doydə ki,dəvominə sulh iyən əmniyyət fəğət çe ğudrət,hozzıəti iyən xandi kardey sayədə hosil beydə".
İroni Ləşkəri Sər Ğərorqo rəyis çe şəhidon şərəfinə məğami de ehtıromi yod kardə holədə və çəvon mığəddəsə mudafiyədə nışon doə rəşodət iyən şucoəti zikr kardə holədə əlovəş kardə:Ləşkəri əzizə şəhidon deştə conon fədo kardey,çe İslomi İroni ərazi təmomiyyət,istiğloliyyət və ləyoğətışon mudafiyə karde və ıştə vətəni i zərrəşon həm çe dışmeni ixtiyorədə ğərol nıdoşone.Imruj hərbi ğıvvon çə həmonə şəhidon şərəfinə roy dəvomçiyonin və əmə çəvon royədə hərəkət kardə holədə,İslomi İnğılobi barzə ideyalon deştə imon,şucoət və səmimiyyəti muhofizəro hozzı bıənimon.
Admiral Səyyari bə İslomi canqəvaron fədokorəti və vətənpərvərəti rufi işorə kardə holədə votəşe:İroni ləşkər çe Hərbi Həvo Ğıvvon fəxrinə piloti əbədiyə sıxanon;“Çımı Vətəni sərzəminonku i zərrə bə dışmeni ləskəri çəkmə dəçıko,əy deştə xuni bəşıştem” votə şəhid qeneral-mayor Məhəmməd Xələtbəri çe İslomi İroni canqəvəron bə vətən və inğılobi ideyalon məhəbbət və ğıryəti zirvə ifodə kardedə.
Admiral Səyyari oxoyədə bəştə bovə və milli ixtidori roy dəvəm doey təkid kardə holədə votəşe:"İron İslom Respublikə Ləşkəri ımrujnə nufuz çe imon,bəsirət,nizom-intizom və bə İnğılobi Rəhbəri əmron sadığəti sayədəy. Şubhə ni ki,çanədə ki,ın prinsipon çe silohinə ğıvvon miyono mevcud bıbu,hiç qıləy təhdid bə İslomi İroni əmniyyəti və mıstəğiləti zərəl rosney əzıni”.
