Ğalibaf:Pokıston bo har zəmoniro duste

İroni İslomi Şura Məclisi sədri cımə şəvi sosyal medyadə ıştə şəxsi səyfədə nıvıştəşe:Pokıston bo har zəmoniro duste.

Bə Pars Tudey doə məlumoti əsos,İroni İslomi Şura Məclisi sədr Məhəmməd Bağır Ğalibafi bə Pokıstoni rəsmi səfə zəmonədə de çın kişfəri barzə vəzifəynə rəsmiyon,ə cumlə həm de Milli Məclisi sədri,de Senati sədri və de Pokıstoni muvəğğəti prezdenti muhimmə didoonış kardə.In se rujnə səfə,xususən de ixtisodi və parlament sahəonədə dıtərəfinə munasibəton zumand kardey məğsədi bə həyot dəvordıney bıə və Tehron-İslomobodi munasibətonədə sıftənə noxtə hisob kardey beydə.

De Pokıstoni Milli Məclisi sədr Əyaz Sadıği bıə didoədə Ğalibaf İslamobodədə beyku ıştə roziyəti iyən məmnunətiş ibroz kardə və Pokıstoni xalği çe seonist rejimi bə İroni zidd təcavizi ələyh dastəqış barz qətə və ım himoyəş çe dıqlə milləti miyono dustiyəti munasibəton nığıləti əlomətış hisob kardə və bə parlamenti həmkoəti nığıl kardey vocibəti təkidış kardə.

İroni İslomi Şura Məclisi sədr həmçinin çe İslomi Respublika seonist rejimi bə İroni ələyh oxonə təcavuzi ğətiyyətinə reaksiya işorə kardə holədə,ın hərəkətış bə ın rejimi çəy icod bıə rujiku jıqoşə mislış nıbə zərbəş zıne.

Bın vindemonədə çe Pokıstoni Milli Məclisi sədr Əyaz Sadığ İroni xalğış de ğələbə munasibəti təbrikış karde və seonist rejimış çe dıqlə məmləkəti mıştərəkə dışmenış zıne və İron iyən Pokıstonış çe sərhədi har dıqlə tərəfədə jiyə iqlə millətış hisob kardə.