İslomi İnğılobi Ali Rəhbəri bəyonoton

İslomi İnğılobi Ali Rəhbər Ayətullah Xameneyi zinə şəvi de azizə İroni xalği televiziya nıtğədə bıə bəyonoton.

İslomi İnğılobi Ali Rəhbər Ayətullah Xameneyi zinə şəvi de azizə İroni xalği televiziya nıtğədə bə Bəsici zu zumandəti və omə nəslonədə dəvom kardey vocibəti təkid kardə holədə,əvış"qıləy dıjdə sərvət,qıləy universalə hərəkot və çe milli zu ziyodətiyədə qıləy amil" beyış bəyon kardə.Əv,çe AİŞ və seonist rejimi bə İroni kardə hucumi məğsədonku bə hiç qıləyni noyil nıbey çəvon beşubhə nokoməti əlomətış zıne.Ə həzrət,bə milləti çandə qılə tevsiyə kardə holədə,qırd insonon və siyosi qrupon bo milli ibemoni xandi kardey və zumand kardeyış tələb kardə.

Bəsici yol qəteyro bə rəsmiyon tədbir vindey vocibəti işorə kardə holədə,Əv,Bəsicış Xıdo niyyətin və vicdonin,bəştə bovə kardə və de ğeyrəti hərəkət kardə qıləy erjinə milli hərəkotış hisob kardə və əlovəş kardə:Bəsici çominə nəsl,yəni çe kişfəri daxilədə azizə cıvonon bo ko kardero və səy nışon doeyro hozzon və Bəsici vey erjin iyən vocibə hərəkoton bəpe çe omə nəslon tərəfiku inkişof bıko,dəvomin,vey komil və vey zumandə formədə kişfərdə dast bə dast doey bıbu.

 İnğılobi Ali Rəhbər bənə Bəsici bıə hərəkoti mevcudətiş bo har qıləy kişfəri ro oj kardə və foydənin hisob kardə holədə əlovəş kardə:Bə beynəlxalğə hoziyəti və ğoldorəti ələyh oşkoə şikilədə mığovimət nışon doə və ıştəni nığo doə bənə İroni qıləy kişfəri bə Bəsici bəsə coqlə kişfəronsə veyə ehtiyociş heste.

Ayətullah Xameneyi çe xalğon bə zolımon taməhkoəti və mudaxilə ələyh mığoviməti zəruri bey işorə kardə holədə votəşe: İronədə icod bıə və inkişof kardə mığoviməti dıjdə unsur Ğərbi kişfəron və hətto AİŞ həm daxil bıə holədə çe dınyo mıxtəlifə məntğəonədə bə Fələstin iyən Ğəzzə dastəki şuoronədə vindey bəbe.Əv,çe Bəsici bəyjiyəti iyən barzə ruhiyyəş çe milləton bə dınyo zolımon zidd mığoviməti ruşdi mənbə hisob kardə holədə əlovəş kardə:Dınyo məzlumon de mığoviməti ruşdi çe dastək iyən ğudrəti hissi dəvordıneydən.

Bəsici çiç bey izoh kardə İnğılobi Yolə Rəhbəri əlovəş kardə:“Təşkiloti formədə və çe İnğılobi Mıhofizə iqlə hissə bıə holədə, Bəsic bə dışmenon ələyh bə qıləy mehkəmə çehrə və bə xalği xıdməti dimi malike.Əmmo vey əhəmiyyətin,Bəsici çe kişfəri daxilədə və ixtisodi,sənaye,elm,unversitet,sahə,istehsol,biznesi muhit və diqər sahəonədə ğıyrətin,bo ko kardero hozzı, motivasiyəyn və de umu bıə har qıləy şəxs və qrupədə ıştəni nışon doə qıləy hevujə əhotə dayirəş heste .”

Həzrət Ayətullah Xameneyi “ın umumi və bə hartərəfinə tarifi malik bıə Bəsic-ış” çe dışmeni hərbi,ixtisodi,istehsol,texnoloji və qırd sahəonədə bıə planon darışteyro qıləy vositəş hisob kardə və votəşe: 12 rujnə muharibədə şəhid bıə əzizə alimon, raketon dizayneron,çəy inşootçiyon və əy ğandə kəson,bə şoyiəon və vəsvəsəon zidd de mehkəmə məntığ və ruşinə ifodə maarifin kardə və bə ruşinəti kardey ko dəvom doə har kəs,canqi zəmonədə noxəşxonəku benışə fədokorə doktoron və tibbə dodon və beynəlxalğə arenaonədə bə Xıdo,bə dini,kişfəri və bə milləti ıştə sədoğəton ifodə kardə idmoni ğəhrəmonon,bə Bəsici təşkiloti uzv bıbon ya nıbon,əvon həmmə Bəsiciin.Əy əlovəş kardə:De Bəsici bey fəxr kardə İmom,bə qıləy mıəyyənə qrupi mənsub nıbə və qırd etnik qrupon,qildiyaon və təbəğəon əhotə kardə jıqo qıləy hartərəfinə Bəsici dumo be.

İnğılobi Ali Rəhbər çe Bəsici həxədə oxonə məğamədə bə devlətə onemonon qırd rəsmiyon təkid kardə holədə əlovəş kardə:Bənə Bəsici,ıştə vəzifəon de imon,motivasiya və şevği bə vırə bırosnənən.

Iştə ehandımoni diqər hissədə,de reqiyonal məsələon və 12 rujnə canqi anqıl Ayətullah Xameneyi votəşe:12 rujnə muharibədə İroni mərdum şubhə ni ki,həm Amerkə,həmən seonist rejimış məğlub karde.əvon omin şərə koşon karde, əmmo məğlub bin və dast təyli oqardin və bəştə hiç qıləy məğsədon nırəsin ki,ım həm bo əvon əsl məğlubiyyət be.

Ə həzrət bə seonist rejimi de İroni 20 sornə canqi plani anqıl sıxanon işorə kard holədə votəşe:əvon milləti təhrik kardey və əvoni bə nizomi ələyh mubarizə məcbur kardey zınə qıləy canqi planışon kəşəbe,əmmo vəzyət çımi əks be və əvon jıqo qıləy şikilədə nokom mandin ki,hətto bə nizomi zidd bıə kəson həm çe nizomi tərəfışon qəte və kişfərədə qıləy umumi ibemon icod be.

İnğılobi Ali Rəhbəri votəşe:Həlbəttə ki,əmə həm xəsorətımon vinde və bə canqi təbyəti əsos veyə insonon çəmə dastiku şe, lakin İslomi Respublikə çe irodə və ğudrəti mərkəz bey və çe hay-kuykuon vədə nıtarsə holədə mandey və ğəroron ğəbul kardey zıneyış nışon doe.Çımonsə əlovə,bə təcavuzkorə dışmeni qıniyə maddiyə zərbəon çəmə maddiyə ziyononku vey be. Ə həzrət,çe Amerkə 12 rujnə canqədə vində bə qırd ziyonon işorə kardə holədə əlovəş kardə:Amerkə bın canqədə de şiddəti ziyonış vinde,çunki bəştə vey oxonə mısoirə hucum və mudafiyə silohonku istifodə rəğmən,milləti bədast dənoey və əvoni deştə bə ico kardey məğsədi rəsey nızıne.Çımi əks,milləti ibemon ziyod be və Amerəkə həm məğlub obe.

Ayətullah Xameneyi Ğəzzə fociyədə çe seonist rejimi rısvoyçəti və şiddətinə bədnomətiş çı reqiyoni torıxi həmməysə muhimmə fociyəonku qıləyni zınə holədə ğeydış kardə:Amerəkə bın məsələdə çe ğəsbkorə rejimi tərəfış qəte və ım,əvış bə oxonə dərəcədə bıə rısvoyçəti və bədnoməti holiş varde,çunki dınyo milləton zıneydən ki,seonist rejim Amerkə nıbə holədə anədə fəlokət icod kardey nızəıni.Əv,ımruj dınyoədə həmməysə veyə nifrət kardə bıə inson çı seonistə hukuməti səyvon və dınyo idorə kardə həmməys ziyodə nifrət kardə bıə təşkilot və dastə seonist rejimış zıne və əlovəş kardə:Amerkə çəvon tərəfədə bey xoto çe seonistonku nifrət bə Amerkə həm siroyətış karde.

 İnğılobi Yolə Rəhbər Amerkəş çe dınyo mıxtəlifə vıronədə bıə mudaxiləonış çəy ziyod bıə təcridəti coqlə amilış hisob kardə və votəşe:Amerkə bə har qıləy məntəğə mudaxilə bə muharibə və ya qenosidi,bə xərobəti və dəvitey səbəb beydə.

Ə həzrət,Ukraynadə boho bəsə omə və benəticə canqış çe Amerkə mudaxiləonku qıləy numunəş hisob kardə və əlovəş kardə:In muharibə bə se ruj həll kardey votə AİŞ ısətnə prezdent,təxminən i sori bədiqə,bə canqi dılə daxil kardə qıləy kişfəri 28 maddəynə qıləy planış tətbiğ kardə.

 Ayətullah Xameneyi çe seonist rejimi bə Livani hucumonış,bə Suriya zidd təcavuzış və Ğərbi Sahilədə bıə cinoyətonış, Ğəzzədə bə əməl omə yavə vəzyətış bənə çe Amerkə şərə rejimi bə muharibə və cinoyəton oşkoə himoyə coqlə numunəonış zıne və voteşone:Həlbəttə ki,əvon çe İroni hukuməti de qıləy mıəyyənə kişfəri vositə bə Amerkə mesaj vığandey barədə şoyiəonku bəhs kardedən,əmmo ımon,təmomən duyə sıxanonin və jıqo qıləy çi ğətiyyən mevcud bıəni.

Bə Amerkə çe seonist və cinoyətkorə dastə dastək doey mığobilədə hətto bəştə duston həm xəyonət kardey və bə ımrujnə Latın Amerkə rəsə bə nat və zəminiji sərvəton xoto dınyoədə canqi şuləvər kardə səyon işorə kardə holədə votəşe:Jıqo qıləy devlət,de İslomi Respublika çe həmkoəti və munosibəton icod kardey dumo nəvə qıləy hukumət ni.

Iştə nıtği oxonə hissədə Ayətullah Xameneyi bə milləti çandə qılə tevsiyəş karde ki,çımonku iminə qılə milli ibemoni nığo doey və zumand kardey be.Ə həzrəti votəşe:Siyosi qrupon və fraksiyaon miyono fiki ixtilofon heste,lakin bənə 12 rujnə canqi bə dışmeni ələyh bə ico mandey vocibe və ım həmrayəti bo milli hakimiyyətiro vey vocibə amile.

 İnğılobi Yolə Rəhbər bə prezdenti iyən xıdmət nışon doə hukuməti dastəki tevsiyə doə holədə votəşe:Kişfəri idorə kardey ko saxt iyən sanqine və hukumət həmçinin çe Şəhid Rəyisi nimədə mandə koy dəvom doey həm daxil bıə holədə çokə koonış bino kardəı ki,de Xıdo izni xalğ çımon nəticəon bəvinde.

Yolə Rəhbəri bə milləti seminə tevsiyə nun,ğaz,benzin və ərzoği məhsulon həm daxil bıə holədə qırd məsəlonədə çe isrofçətiku pərhiz kardey be.Əv,isrofçətiş bo xıyzonon və bo kişfəriro həmməysə vocibə təhlukəonku və ziyonoku qıləyniş zınə və votəşe:Əqər ziyodə isrofçəti bıənəbe,çe kişfəri vəzyəti beşək ki,vey çok əbi.

İnğılobi Yolə Rəhbəri bə xalği oxonə tevsiyə de Xıdo rabitə zumand kardey və voş,əmniyyət və rifoh həm daxil bıə holədə bo har çi xoto dıvo kardey be ta Xıdovənd deştə fəzl iyən lutfi bo məsələon islohiro qıləy vositəon hozzı bıko.