İmom Xameneyi bə Amerkə doə çəşnavi

İmom Xameneyi bə Amerkə oşkoə xəbərdorəti:Əqər canqi binokon,ım,reqiyonalə muhoribə bəbe

Pars Tudey-İslomi İnğılobi Yolə Rəhbər İronədə muxtəlifə təbəğəonku bıə de çand həzo insonon didoədə votəşe:İroni xalğ oxonə Amerkə-seonistə fıtnə otəşışon bənə navnə qırd suyi-ğəsdon bə xokə təbdilışon karde və ayəndədə har qıləy hodisə mığobilədə koy bə oxo bərosneyn.

İşambə ruji,mıborəkə Fəcri darujon iminə rujədə və İronədə muxtəlifə təbəğəonku bıə de çand həzo insonon didoədə İslomi İnğılobi Rəhbər İmom Xameneyi 12 Bəhmənış mustəsno və torıx ofəyə qıləy rujış hisob kardə və "Fərdi,avtoritar,bə dini zidd və bəşıkrə" Pəhləvi hukuməti bə "dini peyo onə bıə və bə istikborinə ğudrəton hoziyəti ələyh mandə xalği hukuməti" təbdil bey işorə kardə holədə,çe Amerkə İroni ebordıney səyon və salehə milləti bə ın taməhkorəti zidd mığovimətış,çe İroni de Amerkə miyono 47 sornə mıborizə əsosə səbəbış hisob kardə.

 İslomi İnğılobi Rəhbər bə amerkəvıjon oxonə sıxanon işorə kardə holədə,əlovəşon kardə:Əvon navko bo İroni xalği torsıneyro"həmmə variyanton mizi peyoe" voteydəbin və həlbəttə ki,əvon bəpe bızınon ki,ın dəfə canqi binokon,ım,”reqiyonalə muhoribə” bəbe.

Ayətullah Xameneyi İroni bəçəy soybi-yəni bə milləti-oqordıney və çe Amerkə nufuzi dasti çe İroniku bırniye çe İslomi Respublikə nizomi xususiyyətonku qıləyni hisob kardə holədə votəşe:Im xususiyyət Amerkəş norohət iyən dastpoçəş karde və hejo çə rujiku etıborən bə milləti və nizomi zidd dışmençəti səbəb be.

İroni mıxtəlifə sahəonədə bıə navşemoni bəyod vardə Həzrət Ayətullah Xameneyi əlovəşon kardə:Ki bovə kardedəbe ki,İroni xalğ i ruj amerkəvıjon çəvon istehsol kardə silohon kopyə kardə bə qıləy noxtə bərəse? Imon həmmə çe “bəştəbovə,umu iyən və ambisiya nəticə be ki,İmom Xomeyni(r) millətədə  bənə "umu və bəştəbovə təzohuri" icodış karde və mərdumış bo səy nışon doey və hərəkət kardey vodorış karde.

Ə həzrət,həyğətən həm xəbisə xarici və daxili şeytonon bənə "İroni cıvonon umu və vəoməşon ni" vəsvəsəon bə yod vardə holədə votəşone:"İroni cıvonon həm umu,həmən ğətiyyətışon heste və deşmə kuyə çəşon ayəndə bəsoxteyn".

Iştə nıtği coqlə hissədə İslomi İnğılobi Rəhbər bə "18 və 19 dey fıtnə" və bə Amerkə və seonistə mohiyyəti təkidışon karde və iğtişoşçiyonış çe "lideron" və "piyodə əskəron" kombinasiyaş hisob karde və əlovəşon kardə:"Çoko ki,etırofışon kardə,çəvon veyni həbs bıə lideron bəştə hərəkəton xoto pulışon seyə və bə mərkəzon çoko hucum kardey,cıvonon çokonə cəm və səfərbər kardey barədə təlimışon vində;əmmo diqər iğtişoşçiyon çəmə hiç qıləy problemımon nıbə emosiyonalə cıvonon bin ".

Ayətullah Xameneyi çe AİŞ prezdenti sıxanonış oxonə iğtişoşi çe Amerkə və seonistə mohiyyətiku qıləy oşkoə əlomətış zıne və votəşe:əv,çe İroni mərdum zınə iğtişoşçiyon oşkoə şikilədə"Dəvom bıkən, mı həm omeydəm!" voteydəbe.həlbəttə ki,bəçəvon nəzə əsos,ım çandə qılə iğtişoşəkə İroni xalğ be, lakin 22 deyədə çe kişfəri daxilədə cəm bıə çand milyon inson İroni  millət nıbe.

 İslomi İnğılobi Rəhbər bənə dəvominə dışmenəti səbəbi çe İslomi Respublika nuyə təfəkkuri tərz və ro, həmən de dınyo ğoldoron mənafeyon bıə ziddiyyəti nışon doə holədə votəşe:Çın səbəbiku oxonə fıtnə Tehronədə çoko ki,iminə fıtnə nıbe,oxonə fıtnə həm nibəbe və bənə ımi hodisəon ayəndədə təkror bey bəzıne.

Ə həzrəti əlovəşon kardə:In dışmenətiyon de İroni mərdumi sabitəti,əzmi və bə koon tam nəzorəti tosə dışmeni noumu kardey dəvom bəkarde ki,əmə həm bə ın noxtə bərəsemon.

Ayətullah Xameneyi çı Amerkə oxonə fıtnə xususiyyəton təsvir kardə holədə çəy iminə xususiyyətış çe vıjori əhli etırozon peştono niyon bıə iğtişoşçiyon hisob kardə holədə votəşe:İğtişoşçiyon,bə şəhron hucum kardə holədə,çe jen iyən hırdənonku bənə sipəri istifodə kardə cinoyətkoron,çı məntığin və rostəvoj və bə kuçəon beşə vıjori əhli peştono niyon bıəbin ki,məlum kardey nıbon.

 İslomi İnğılobi Rəhbər əlovəşon kardə:Həlbəttə ki,ağılmandə vıjori əhli çe iğtişoşçiyon bənə bə polisə məntəğəon hucumi bıə hərəkəton muşohidə kardey bədiqə kuçəonədə oromə hərəkət kardey əvəzi, ıştənışon çəvonku co karde və iğtişoşçiyonışon coyli haşte.

Ə həzrət,oxonə iğtişoşi dıminə xususiyyətış uryonə peqordıımon zınə holədə votəşe:Dınyoədə bənə  bəziyon ğeyd kardey,ım iğtişoş bə peqordıımoni mandəbe;həlbəttə ki,hıtovney be,lakin bə polisi,bə İİMK mərkəzi,bə hukuməti bəzi mərkəzon və bankon hucumon və məçiton və bənə Ğıroni mənəvi elementon hucumon royku çe kişfəri idorə kardeyədə həssos və təsirinə mərkəzon məhv kardey ın realəti numoyiş kardedə.

 Ayətullah Xameneyi dey manqi iğtişoşon coqlə xususiyyətış xaricədə iğtişoşi plani kəşey və daxili lideron bənə peyki məlumoton de mıxtəlifə vositəonku istifodə kardə holədə rəhbərəti kardeyış nışon doe və ğeydışon kardə:“Bə dast omə məlumoton əsos,hukumətədə bıə qıləy nufuzinə Amerkə unsuri bə ironıjə həmkoş votə ki,CİA və Mossadi casusəti aqentətiyon de ın məsələ anqıl ıştə qırd resursonışon səfərbər kardəşone”.

İslomi İnğılobi Rəhbər çe iğtişoşi lideron tələfoti ədədi vey kardeyədə bıə mıvəffəğ beyku ıştə təəssıfin bey bəyon kardə holədə votəşe:“İnsonon dılon bə ın ğafil və bedığğətə cıvonon xoto dəjedə”.

 Bə deşmeni bo kıştə bıə kəson rəğəmi da bərobər nışon doey cəhdi işorə kardə Həzrət Ayətullah Xameneyi votəşe:“Əvon çe kıştə bıə kəson ədədi çımisə vey beyışon piyedəbe;həlbəttə ki,bın rəğəmədə tələfot həm veyə təəssıf icod kardedə”.

 İslomi İnğılobi Rəhbər de oxonə fıtnə əloğədor ğeyd kardə oxonə xususiyyət,çəy bənə İŞİD-i bıə vızməti be;AİŞ-on ısətnə prezdent ıştə iminə prezdentəti devrədə bə AİŞ hukuməti İŞİD-i icod kardeyədə bıə iştirokı barədə etırofi işorə kardə holədə votəşe:“Oxonə fıtnədə amerkəvıjon hərəkəton bənə İŞİD-i bıə qıləy İŞİD-şon ofəye.İŞİD de bedinəti ittihomi insononış de hoziyətiş məhf karde və ım insonon eynən de həmonə vızmətiyon bin,əmmo nəyinki,bə dini bovəon xoto,de əcib-ğəribə ğəddorəti və de beəmonəti insonon bəyji-bəyji sutuneydəbin və çəvon səon bırniyedəbin”.