Tehroni cumə nımoji xutbəon
Tehroni cumə nımoji xətib iraği Hillə şəhrədə 5 şanbə ruji terroriston hərəkətış ki bə Huseyniyə zairon 80 nəfər əcumlədə 40 qılə ironıjə zairi şəhodət bois be məhkumış karde.
Huccətul islam vəlmuslimin Kazım Seddiği tehroni ım haftə cumə nımoji xutbədə iraği Hillə şəhrədə Huseyniyə zairon roədə terroristiyə tıpımoni nəticədə bə şəhidə ailəon səbəsəlomətiş do və votışe: zaironru Əbaəbdillah Huseyn(ə) roədə şəhoədt fəxr heste.
Huccətul islam vəlmuslimin Seddiği Huseyniyə ərbəinış ğeymətinə sərmayə iyən dıştə meyl iyən rizo qıləy hərəkətış zınə ki bə mıslmonə milləton vəhdət bois bedə bə ıştə sıxanon dəvomədə əlavəş karde ım yolə mərasimədə cəmaəti əzəmətinə huzur bə islam dınyo zid fitnəqərə hərəkəton bə nəticə nırəseyu muhimmə dəlilış zınə.
Tehroni mıvəğğətə cumə imom Ərbəine Huseyni mərasimədə bə zairon və beşeyu iraği devlət iyən millətiku təşəkkurış karde və votışe: İron İslam Respublika əmniyyəti iyən polis ğıvvon həm zairon və hətta xariciyə zairon əmniyyəti təmin kardeyu mısbət hərəkətış kardə.
Huccətul islam Seddiği həmçinin məntəğə məmləkətonədə Amerkə hərbiyə dəxalətonku işarəş karde və bə ım məmləkəti tojə devləti sifarışış karde canq bino bıkə siyasəton və məntəğədə dave təşkil kardeyu milyardon dollar co karde əvəzi Amerkə milləti saxtə məişəti həl bıkən.
Tehroni cumə nımoji xətib həmçinin Amerkə tərəfiku bə ironi zid bu 10 sor sanqsiyaon dəvom pəydo kardeş atom məsələ həl kardeyu təşkil bə təvafuği ləğv kardeş zınə və əlavəş karde bə islamiyə inğilabi yolə rəhbəri bəyonoti əsosi əqər ım sanqsiyaon əməli bıbon de ğətiyyəti reaksiya nışon bədomon.
tehroni mıvəğğətə cumə imom həmçinin Bəhreynı məmləkətdə ale xəlifə rejimi tərəfiku bə Ərbəine Huseyni (ə) mərasimi mane be xoto reaksiyaş nışon do və beynəlxalğə təşkilaton iyən insonə həxonku mudafiyə bıkə təşkilaton nomo bə mərkəzon tam jəeku qilayəş karde.
tehroni cumə nımoji xətib Niqeriya islamiyə hərəkati rəhbər şeyx İbrahim Zəkzaki dəstqir be dəvomiku bə əhle beyt(ə) bovə xoto iyən çı məmləkəti huseyniyəon xərobə kardeku tənğidış karde və ım hərəkətonış məhkum karde.
