Pezeşkiyan: İslomi kişfəron nezəti zumand kardey reqiyonədə sabitəti bərğəror kardey amile.

Pars Tudey-İroni prezdent bə reqiyoni dıjdə ehtiyoton və kapitali işorə kardə holədə xəbərdorəti kardəşe ki,bə ın sərvəton de təməhkorə çəşon nəzə kardə dışmenon bo əvoni bə dast vardero nifoğ,mıhoribə və mınoğişə icod kardero səy kardedən və deəvon mıborizə bardey yeqanə ro,çe İslomi kişfəron oğoəti və ibemoni xandi kardeye.

Pars Tudey bə IRNA istinodən doə məlumoti əsos,seşanbə ruji de İraği Respublikə Ali Məhkəmə Şura sədr Faiğ Zidan iyən əy mışoyiət kardə nımoyəndə heyəti bıə vindemonədə çe İroni prezdent Məsud Pezeşkiyan bə hamsuyə və mısılmonə kişfəron miyono ibemon iyən həmrayəti xandi kardey vocibəti təkid kardə holədə bəyonış kardə:İslomi xalğon mədəni,ticori,sosyal, siyosi və ixtisodi mıtəğobilə əloğəon bəsə navnəsə həm vey hovuj kardey vocibe,çunki ın nezəti reqiyonədə AİŞ və seonist rejim həm daxil bıə holədə bə mıştərəkə dışmenon ələyh əmniyyət, sulh və sabitəti bərğəror beyədə qıləy amil bəbe.