İslami inğilabi yolə rəhbər:İron iraği qıləy hissə co kardeyu referendomədə muxalife.

İslami inğilabi yolə rəhbər Həzrət Ayətullah Əl-uzma Xamenei de İŞİD mubarizə kardeyu iraği həmmə siyasi və məzhəbiyə cəriyanon vəhdət və həmkarətionku tərifış karde və milləti tərəfiku mubarizə əkə ğıvvəş qıləy muhim və mubarəkə məsələş zınə iyən bə iraği iğtidar boisış zınə.

İslami inğilabi yolə rəhbəri zinə əsrə vaxti de iraği 1 minnə vəzir Heydər Əlibadi vindımonədə votışe: İron İslam Respublika bənə hamsuyə bəzi sıxanonədə mincumlə  iraği qıləy baxşi co kardeyu referendomi dəvoneədə muxalife və kəsoni ki jıqo məsəlonku qəp jedən de iraği istiğlal və şəxsiyyəti muxalif hestin.

islami inğilabi yolə rəhbəri bə iraği sərzəmini vəhdəti hifz karde zərurəti işarəş karde və votışe: bəpe amerkəvıjon vədə huşin be və heç qıləy holətədə bəvon bovə nıbo çunki Amerkə və çəvon roədə bıə zəifə odəmon de iraği istiğlal şəxsiyyət və vəhdət muxalif hestin.

Həzrət Ayətullah Əl-uzma Xamenei Amerkə və amerkə roədə bıə zəifə odəmon de Həşd-Əlşəbi (milləti tərəfiku mubarizə əkə ğıvvon) muxalifət kardeku işarəş karde və votışe: amerkəvıjon muxalifət milləti tərəfiku təşkil bıə ğıvvonədə boçimi xotoy ki əvon pidəşone irağ ıştə iğtidari muhimmə dəlili dastdə bıdə.

Həzrət Ayətullah Əl-Uzma Xamenei işarəş karde heç qıləy holətədə bə amerkəvıjon bovə  pəydo məkən çunki əvon fursəti domoədə hestin ta zərbə bıjənon.

İslami inğilabi yolə rəhbəri iraği məmləkətdə ixtilaf və 2 dastəti icod beş  zərbə jeyu Amerkə nəzərəndə bə fursətış zınə və votışe: ım fursət bəpe  bəvon doə nıbo  eyne holədə bəpe təlim iyən coqlə məsəlon vavonədə bə amerkəvıjon icazə doə nıbo ta bə İrağ daxil bıbon.

İslami inğilabi yolə rəhbəri işarəş karde amerkəvıjon muxalifət de İŞİD həğiği ni və əlavəş karde amerkəvıjon və məntəğədə bəzi məmləkəton ki bəy tabe hestin İŞİD terroristiyə dastə nabod karde və çəy rişə arəku barde domoədə nin çinki İŞİD çəvon tərəfdarəti iyən  pulədə icod bə  və pidəşone qıləy İŞİD ki çəvon mıştədəy irağədə bımando.