Ğasımi: İroni barədə çı Amerkə rəftoron deşmənti karde mənoədəy.

İroni xarıci vəzarətxanə sıxənəvot votışe: İroni vədə Amerkə ıştə deşmənçiyə hərəkət və siyasətiku dast peqəte pidəş ni.

Bəhram Ğasımi təsdiğış kardə: bə Amerkə dıvlət xatircəm mande imkonış ni boçi ki çəvon rəftor və sıxənonədə çandə 2 dimti heste.

İroni xarıci vəzarətxonə sıxənəvot bə İroni ətomiyə təvafuğədə Amerkə rəftoron işorəş kardə ijən təkidış kardə ki Amerkə deştə siyasəton bo İroniro siyasi və iğtisodiyə vəziyəti anədə saxtış kardə ki İron çın təvafuğiku çok istifodə nıko.

Bəhram Ğasımi Amerkə niqəraniyon barədə votışe: Amerkə əqər çı İroni ğudrəti barədə niqərane bəbe çok bızno ki İroni vədə tədbir nıkardə hərəkəton nəticə fəğət Amerkə peşimonəti bois bıdə.

İroni xarıci vəzarətxanə sıxənəvot İron və Kuveyti miyono rabitəon barədə həm votışe: Kuveytədə İroni diplomaton xaric bənin ijən əvoni bənə təhdid elan karde səhih ni bəlkəm Kuveyt tələbış kardə ki çın kişvərədə İroni diplomaton miğdor kam bıbu ki əlbətə de diğğət bə İron və Kuveyti miyono dəvardə dıvrə rabitəon ım kişvəri məzəmmət karde lozime.

Ğasımi Ərəbistonədə bo İroni diplomaton səfər kardero viza sadir karde barədə bə muntəşir bıə xəbəon işorəş karde ijən votışe: hələ bo həcci zairon koon təğib kardero İroni diplomaton viza sadir bə ni və hol ım ki konsuliyə amilon bəbe çımiku bə nav əyo huzurışon bıbu.