Ruhani: İron yəğin çı Amerkə cəvubi bədoy.

İroni prezident bə Amerkə kanqresədə tojə təsdiğ bıə təhrimon reaksiya nışo doe xoto təkidış kardə: Amerkə kanqresi tojə deşmənçiyə hərəkəton vədə İron yəğin ciddiyə reaksiya və cəvub nışo bədoy.

Həsən Ruhani: zinə dıvlət kabineti iclosədə işorəş kardə ki Amerkə 40 sore i tərəf bə İron fişar vardə və təhrim iyən sanksiyaon təsdiğ kardə və co tərəfo de məntəğə kişvəron təhrik karde vasitə İroni bə zəhmət eğandedə əmmo bəbe ıştə təcrubəku dərsış bıbu ki jıqonə siyasəton hiç foydəş ni boçi ki Amerkə həmişə İroni vədə məğlub bıə ijən bəbe ıştə yande bəpeşt məğlubiyətonku dərsış bıbu.

Ruhani əlovəş kardə: Amerkə əqə pidəşe Nızə Şərğ əmn bıbu ijən Fars Dıyodə bo qəmion şe-omero əmniyyət bərğəror bıbu bəbe ıştə siyasətonku bə kəno bımando ijən oğo bızno ki İron hiç faxt çı Amerkə planon jentonədə ni ijən bəştə hədəf iyən bərnoməon dəvom dodə.

İroni prezident votışe: Amerkə bəbe bə İroni milləti həx və huğuğon ehtırom bınə və oğo bıbu ki fəğət çı ehtırom və milləti həxon oqəte sayədə həmçınin de sulhinə roon vasitə Amerkə milləti mənafe təmin bıdə.

İroni prezident Ağaye Ruhani çı Amerkə deşmənçiyə rəftoronış İroni mığovimət, zumandəti və olqo mandeku rişə qəte zınəş be və təkidış kardə: Amerkə tov nibəvarde ki jıqonə həssasə məntəğədə İron çı istiğlol və zumandə təsiron xıvand bıbu.

İroni prezident bə İroni mudafiə ğudrəti əlovə karde işorəşkarde və votışe: İron ıştə ehtiyocinə silohon mıstəğil istihsol bəkay ijən həmmə silohinə ğıvvon çı milləti himoyəon jentonədən.

Amerkə nımoyəndəon parlament tojədən de 419 qılə rəy və sədo İroni vədə tojə sanksiyaon təsdiğ kardışone.