İslamiyə vəhdət iclosi oxonə bəyoniyədə bə Fələstini tojə intifazə təkid be.

İslamiyə vəhdət beynəl xalğiyə 31 iclos zinə ıştə oxonə bəyoniyədə Ğudsi barədə çı Amerkə prezidenti sıxənon məhkumış kardə ijən şərifə Ğudsi barədə bə islam dınyoədə muğavimət iyən bə Fələstinıjon tojə intifazə(ğiyam) təkidış ka.

Im iclosi oxonə bəyoniyədə ki islam dınyo şiə və sınni alimon huzuri tono elan bıə şərifə Ğudsi bənə paytəxt elan kardero Amerkə vədə mande xoto bə mısılmonon ciddiyə iradə təkid be ijən jıqo ğeyd bıə ki mısılmonon bəbe ıştə mığəddəsə vırəonku mıhofizət bıkun.

Bəyoniyə co baxşədə bo islamiyə təməddoni bərpo karde xoto bə İslam dınyoədə zərfiyəton ijən deşmənon vədə mandero bə islamiyə kişvəron miyono vəhdət təkid be.

Həmçınin islamiyə kişvəroni bənə Əfğanestan, İrağ, Suriyə və Yəmənədə cinoyəton və vironəonku iştirok əkəyon ıştə təəsufi elan kardən ijən təsdiğ bıə ki: islam dınyodə bəzi mıvcudə dıvlət və cərəyanon ki istikbar və siyonist rejimi hədəfon əməli kardero cəhd kardedən həminə dard və cinoyəti amilonin.

Imsornə iclos de 500 nəfər xarıci və daxıliyə mihmanon iştirok detos dekabri 7 dəvomış be ijən çəy şoar vəhdət iyən islamiyə tojə təməddoni zəroriyat elan bıə be.

Vey alimon və rəsmi şəxson dınyo muxtəlifə kişvəronku həminə iclosədə nıtğışon kardən.

Çandə ixtisusiyə kamissiyaon əcumlə islam dınyo ısətnə vəziyət, mədəniyət əsoxtə alimon çoknə fəal karde, ğərbiyə təməddoni mığoyisədə islamiyə tojə təməddoni xususiyəton, çı islam dınyo ijən bəji əkə planon, mısılmonon miyono vəhdət və ıştəni bovə karde təsir ijən islamiyə tojə mədəniyəti bənə vəhdəti strateqiya zıne həm Tehronədə islamiyə vəhdət nomo bıə islosi kənoədə bərpo be.

Imsor həmçınin mığovimət alimon beynəl xalğiyə i bemon, seydon beynəl xalğiyə icma iyən mısılmonə jenon beynəl xalğiyə icma icloson həm çı vəhdət beynəlxalğiyə iclosi kənoədə barpo be.