De sionist rejim iğtisodi və siyosi rabitəon ğət kardey xoto, İron İslom Respublika prezdenti təkid
İron İslom Respublika prezdent de sionist rejimi iğtisodi və siyosi rabitəon ğət kardey, ım rejimi vədə vey təsirinə mudafiə hərəkətonku zınəşe.
Bə Tele-Rədio aqentiyəti raporti əsos, zinə rujədə və İron və Tırkiyə iğtisodi həmkoətion ali şura 8minnə iclosədə İron İslom Respublika prezdent, Seyd İbreym Rəyisi Ğəzzə tanqədə sionist rejimi cinoyəton məhkum kardey bəpeşt bəyonış kardə ki ımruj Fələstin nə fəğət İRoni vey muhimmə niqəronəti bəlkəm islom dınyoədə və həmmə bəşəriyətiro muhimmə məsələ və niqəronəti bə hisob omeydə, Rəyisi ijən votışe :de sionist rejimi mubarizə bardey bə mudafiə hərəkəton ehtiyoce, və İron İslom Respublika nəzəku de ım rejimi iğtisodi və siyosi rabitəon ğət kardey vey muhimm və təsirinə mudafiə hərəkətonku bə hisob omeydə.
Rəyisi ijən bəyonış kardə: sionist rejimi cinoyətonku vey təəsufinə məsələ ıme ki beynəlxalğə təşkilaton ım cinoyəton vədə sukut kardedən və betafut hestin, əv ijən təsdiğış kardə: sionist rejimiku Amerkə həmmə curnə himoyə, çəy həğiğiyə sima nışo bıdə və bə həmmə kəson subit bıə ki Amerkəvıjon, insoniyə həxonku mudafiə kardey vecudi, bə sionist rejimi daston Fələstini bemudafiə və beqınohə jenon və hırdənon ğətli-amiku himoyə kardeyədə ıştə həmmə cəhdon əncom dodən.
